Innlent

Segir lúxusferðamenn þýða minni átroðning en miklu meiri tekjur

Kristján Már Unnarsson skrifar
Áslaug Inga Barðadóttir er hótelstjóri á Deplum í Fljótum.
Áslaug Inga Barðadóttir er hótelstjóri á Deplum í Fljótum. Sigurjón Ólason

Lúxushótel í Fljótum er orðið næst fjölmennasta fyrirtæki Skagafjarðar á eftir Kaupfélaginu. Hótelstjórinn hvetur til þess að Íslendingar leggi meiri áherslu á að fá efnaðri ferðamenn til landsins, það þýði minni átroðning en miklu meiri tekjur.

Í fréttum Stöðvar 2 var sent beint út frá Deplum en bandaríska lúxusferðaþjónustan Eleven Experience hóf rekstur sveitahótelsins þar árið 2016. Þar starfa núna um 80 manns, þar af 20-25 Íslendingar, og þar er meira að segja þyrluflugmaður til taks fyrir gestina. Gistiherbergin eru þó aðeins þrettán talsins og eru dvalargestir að jafnaði í kringum 20 talsins, en fjöldi starfsmanna á hvern gest segir sitt um hátt þjónustustig.

Reksturinn lá niðri í um eitt ár þegar öllu var skellt í lás vegna covid. En hvernig hefur gengið eftir að faraldrinum lauk?

Gistiherbergin á Deplum eru aðeins þrettán talsins og gestir sjaldan fleiri en tuttugu. Samt eru áttatíu starfsmenn.Sigurjón Ólason

„Fólk var í raun bara æst í að fara að ferðast, eftir að hafa verið svona í einangrun. Þetta hefur í raun bara blómstrað. Við erum búin að vera fullbókuð. Og maður sér svona meiri ánægju í gestunum,“ segir Áslaug Inga Barðadóttir, hótelstjóri á Deplum.

Telja má gesti hótelsins í hópi ríkari hluta jarðarbúa. En hversvegna vilja þeir koma að Deplum?

„Ég held að það sé bara náttúrufegurðin. Að fá að vera á svona friðsælum stað og njóta. Það er enginn eitthvað að hafa afskipti af þér.“

En eiga Íslendingar að leggja meiri áherslu á lúxusferðamennsku, að fá ríkari ferðamenn til landsins? Hvað segja þau á Deplum eftir sína reynslu?

„Já, klárlega. Þetta er náttúrlega minni átroðningur. Og við erum að fá meira út úr hverjum gesti. Ég held að þetta sé klárlega framtíðin fyrir Ísland.“

Heitur pottur og sundlaug eru við hótelið.Sigurjón Ólason

-Skilja þessir ferðamenn meira eftir á Íslandi en aðrir?

„Já, ég er nokkuð viss um það.“

-Og kannski miklu meira?

„Miklu meira,“ svarar Áslaug hótelstjóri.

Í Fljótum eru hvorki stórfossar né jökullón, bara norðlenskir fjallasalir og íslensk sveit. Samt eru gestir tilbúnir til að greiða um 350 þúsund krónur fyrir nóttina á ódýrasta gistiherberginu en dýrasta herbergið á Deplum kostar um 900 þúsund krónur nóttin. Allt er innifalið, bæði matur og drykkir.

Hér má sjá frétt Stöðvar 2:

Ferðamennska á Íslandi Skagafjörður

Tengdar fréttir

Þetta gera þau sem leigja draumabýlin á Tröllaskaga

Bræðurnir John og Eric Jackson fóru á dögunum í skemmtiferð á vegum Depla, eða Eleven Experiences. Þar gengu þeir fjöll, fóru í þyrluferð, veiddu, fóru í hvalaskoðun og margt fleira og var sýnt frá því í myndbandi á YouTube.

Fjaðrárgljúfri lokað til 1. júní

Svæðið umhverfis hið vinsæla Fjaðrárgljúfur verður lokað til 1. júní næstkomandi svo að það geti jafnað sig, eftir mikinn ágang ferðamanna.

Ferðaþjónustan er komin að þolmörkum

Hörður Gunnarsson, framkvæmdastjóri Iceland Travel, segir að laun séu komin að þolmörkum í ferðaþjónustu. Ferðaskipuleggjendur hafa margir hverjir ákveðið að hvíla Ísland á meðan gengið er jafn sterkt og raun ber vitni. Aukinn áhugi er á Íslandi frá NorðurAmeríku og Asíu en þar er sumarfrí styttra.

Alltof margir virt lokanirnar að vettugi

Umhverfisstofnun mun frá og með morgundeginum, 1. júní, opna gönguleiðir á náttúruverndarsvæðunum Fjaðrárgljúfri og Skógaheiði ofan Skógafoss.

Mest lesið


Fleiri fréttir

Sjá meira


×

Mest lesið