Veðja á hljóðfráar farþegaþotur að nýju

Reuters greinir frá en þar kemur fram að American Airlines eigi einnig rétt á því að panta fjörutíu slíkar flugvélar í viðbót.

Vélin nefnist Overture og getur tekið 65 til áttatíu farþega. Í frétt Reuters er tekið sem dæmi að flugvélin eigi að geta ferðast á milli Miami í Bandaríkjunum og London, höfuðborgar Bretlands, á tæpum fimm tímum. Það tekur venjulega farþegaþotu níu tíma að fljúga þessa leið. Áætlað er að flugvélin geti flogið á tvöföldum hraða hefðbundinna farþegaþota.

Flugfélagið býst ekki við að taka vélarnar í notkun fyrr en árið 2029. Vélin er enn á hönnunarstigi en Boom reiknar með að geta framleitt fyrstu vélina árið 2025 og hafið prófanir á henni ári seinna.

Alls hafa pantanir fyrir 130 Overture flugvélum borist Boom, þar af eru fimmtán frá United Airlines, einum helsta keppinauti American Airlines.

Samningar flugfélaganna tveggja eru háðir því að flugvélin mæti öryggis-, umhverfis-, og rekstrarlegum skilyrðum þeirra.

Hljóðfráar farþegaþotur hafa ekki flogið um jörðina frá því að síðustu Concorde-vélinni var lagt árið 2003, vegna mikils rekstrarkostnaðar og minnkandi áhuga viðskiptavina eftir að Concorde vél Air France hrapaði í Frakklandi árið 2000.