Björgvin Karl sjötti í annarri grein dagsins

Önnur grein dagsins bar heitið Upp og yfir (e. Up and Over) en í henni fólust þrjár umferðir af margvíslegum æfingum. Þar á meðal voru tólf upphífingar að mjöðm (e. muscle up), 25 stökk yfir kassa, 30 GHD magaæfingar, auk frekari lyftinga og stökkva.

Hinn bandaríski Saxon Panchik var með algjöra yfirburði í greininni en hann kom í mark á tímanum tólf mínútum og 40 sekúndum. Landi hans Justin Medeiros var annar á 13 mínútum og níu sekúndum.

Björgvin Karl var fyrst skráður fimmti í greininni en því var breytt í sjötta sæti, þar sem tími Noah Ohlsen var upprunalega rangt skráður. Björgvin Karl kom í mark á 13 mínútum og 39,71 sekúndu.

Hann er áttundi í heildarkeppninni fyrir lokagrein dagsins. Björgvin er með 446 stig, þremur á undan Ohlsen og Lazar Dukic frá Serbíu. Panchik, sem vann greinina, er með 458 stig í sjötta sæti en Patrick Vellner frá Kanada er sjöundi 455 stig. Það er því ekki langt upp í næstu menn fyrir ofan Björgvin Karl.

Ricky Garard frá Ástralíu var þriðji í greininni en hann er langefstur með 655 stig. Næstur er Justin Medeiros frá Bandaríkjunum með 568 stig.

Toomey áfram efst - Þuríður fjórtánda

Hin ástralska Tia Toomey var með mikla yfirburði í kvennaflokki en hún kláraði greinina á 11:58,92, mínútu á undan Mallory O'Brien frá Bandaríkjunum sem var á 12:58,91. Aðeins tveimur stigum munar á þeim á toppnum í heildarkeppninni.

Þá varð Emma Lawson frá Kanada þriðja, Haley Adams frá Bandaríkjunum fjórða og landa hennar Kristi O'Connell varð fimmta, en þær voru allar í sama sæti í heildarkeppninni fyrir greinina, svo sú staða breytist lítið.

Þuríður Erla Helgadóttir var fjórtánda fyrir greinina en var átjánda í mark á 15 mínútum og 37,42 sekúndum. Sólveig Sigurðardóttir náði ekki að klára áður en tíminn rann út og er í 36. sæti af 40 keppendum.