Að langa til að skipta um vinnu en þora ekki

Hjá sumum nær þessi ótti þó svo miklum tökum, að þótt fólki langi til að skipta um vinnu þorir það ekki að taka skrefið. Svo mánuðum eða jafnvel árum skiptir.

Er hrætt við óvissun og höfnun. Eða jafnvel það að standast ekki væntingar á nýjum vinnustað.

Til viðbótar er síðan tilfinningin sem flestum finnst ágætt: Að vera bara áfram á þeim stað og í þeim verkefnum sem við kunnum og getum.

En ef þú ert ein/n af þeim sem lengi hefur langað að skipta um vinnu en þorir ekki að taka skrefið, eru hér nokkur ágætis ráð sem gætu hjálpað.

#1. Í hverju felst hræðslan?

Við erum fljót að finna þessa ótta- eða hræðslutilfinningu í maganum, en of sjaldan gefum við okkur svigrúmið til þess að skoða það í kjölinn, við hvað við erum hrædd.

Þannig að fyrsta skrefið er að gefa okkur þennan tíma því oftast kemur í ljós að þessi tilfinning hefur ekkert með raunveruleikann að gera. Alls staðar í kring er fólk að skipta um vinnu og gengur vel og auðvitað eru jafn spennandi tækifæri fyrir þig til staðar.

En hvað hræðistu mest? Að geta ekki gert nógu góða ferilskrá? Að geta ekki svarað spurningum í atvinnuviðtali? Að vera orðin/n of gömul/gamall?

Gott er að skrifa niður á blað allt það sem okkur finnst hræða okkur varðandi það að skipta um vinnu. Því þegar að við sjáum þessi atriði á blaði, áttum við okkur oft betur á því að allt er þetta yfirstíganlegt.

Stundum eru atriðin meira að segja færri en við töldum í upphafi.

Eða við erum fljót að sjá að þau eiga ekki við rök að styðjast.

Hjá sumum getur óttinn stafað af einhverju sem nær nokkuð dýpra. Til dæmis félagsfælni eða feimni. Þeim mun meira áríðandi er að þú gefir þér góðan tíma í að velta fyrir þér hvað þú getur gert til að hjálpa þér að taka skrefið í átt að draumnum. Þú fékkst vinnuna sem þú ert í, hvers vegna ekki þá næstu? Mundu líka að það er annað fólk þarna úti, sem gengur vel í starfi en líður samt eins og þú.

Allt sem getur undirbúið þig undir að sækja um nýtt starf hjálpar. Líka það að máta sig vel við atvinnuauglýsingar og sjá fyrir þér að þú hafir fengið eitthvað draumastarf.

#2. Ekki missa dampinn í vinnunni

Sumir vilja meina að um leið og fólk hefur ákveðið að hætta á einum vinnustað, detti allur kraftur úr því og það sé nánast hætt að vinna við ákvörðunina eina saman.

Þetta er gryfja sem er mikilvægt að forðast. Þess vegna þarftu að halda fókusnum vel á vinnunni þinni og leggja einmitt sérstaka áherslu á að standa þig vel þar.

Því það er mjög líklegt að næsti vinnuveitandi og jafnvel aðrir framtíðarvinnuveitendur, leiti til núverandi vinnuveitanda þíns eftir meðmælum.

#3. Óttinn við að hafa ekki þá þekkingu sem þarf

Stundum dreymir fólk um aðra vinnu í mörg ár, en þorir ekki að þreifa fyrir sér vegna þess að það er svo sannfært um að það vanti mikið upp á menntun eða þekkingu.

Í stað þess að árin líði í þessu viðhorfi, er um að gera að skoða það vel á netinu, hvaða valkosti þú hefur. Margt nám er núna í boði sem fjarnám með vinnu.

Eins er hægt að skoða auglýsingar og kynna sér hvaða kröfur eru gerðar í þau störf sem þér finnst helst heilla þig sem draumastarfið þitt. Hvað vantar upp á? Eru það kannski styttri námskeið sem gætu gagnast?

Svo stór partur er vinnan okkar í lífinu að ef við erum vansæl þar sem við erum dreymir endalaust um meira spennandi eða krefjandi starf, er það alltaf þess virði að kanna málin og sjá hvaða leiðir eru færar til að draumurinn verði að veruleika. 

Því ef við trúum á drauminn, eru allar líkur á að hann rætist.