Leikur við Svía á heimavelli Manchester United í húfi

Íslendingar eru með örlögin í eigin höndum og geta með sigri gegn Frökkum í Rotherham í kvöld tryggt sig áfram í 8-liða úrslitin.

Frakkar eru þegar búnir að vinna riðil Íslands en þurfa að gera sér að góðu að mæta Evrópumeisturum Hollands sem enduðu fyrir neðan Svía á markatölu í C-riðli.

Liðið sem fylgir Frökkum upp úr D-riðli, vonandi Ísland, mun aftur á móti spila við Svía. Sá leikur er á föstudagskvöld klukkan 19 að íslenskum tíma og fer fram í bænum Leigh, í nágrenni Manchester-borgar þar sem Ísland lék fyrstu tvo leiki sína á EM.

Aftur spilað á heldur fámennum leikvangi

Leikurinn í Leigh á föstudagskvöld verður spilaður á Leigh Sports Village sem verið hefur aðalheimavöllur kvennaliðs Manchester United frá því að liðið var stofnað að nýju fyrir fjórum árum.

Sara Björk Gunnarsdóttir og margir fleiri hafa gagnrýnt það að fyrstu leikir Íslands á EM skyldu fara fram á aðeins 4.700 manna leikvangi, heimavelli kvennaliðs Manchester City, en Leigh Sports Village er aðeins stærri. Hann er skráður fyrir 12.000 manns en tekur við 8.100 manns á EM vegna reglna UEFA um að allir áhorfendur séu sitjandi.

Ísland og Svíþjóð mættust síðast í tveimur leikjum í undankeppni Evrópumótsins. Nokkuð er liðið síðan þá því þeir leikir fóru fram haustið 2020. Elín Metta Jensen skoraði í 1-1 jafntefli á Laugardalsvelli en Svíar unnu svo 2-0 sigur á heimavelli.