Ráðherra boðar gjaldtöku í öllum jarðgöngum landsins

Kristján Már Unnarsson skrifar 12. júlí 2022 22:04

Innheimtu veggjalda í Hvalfjarðargöng lauk haustið 2018 þegar vegfarendur voru búnir að greiða upp göngin. Núna eru horfur á að gjaldtaka hefjist að nýju. Vilhelm Gunnarsson

Gjaldtaka verður tekin upp í öllum jarðgöngum landsins á næsta eða þarnæsta ári. Innviðaráðherra boðar frumvarp um málið en tekjunum er ætlað að standa undir kostnaði við Fjarðarheiðargöng sem og önnur jarðgöng í framtíðinni.

Fjallað var um áformin í fréttum Stöðvar 2 í tengslum við Fjarðarheiðargöng, sem verða ekki aðeins lengstu veggöng á Íslandi heldur svo fjárfrek að 17,7 milljarða króna framlög á samgönguáætlun duga hvergi nærri fyrir áætluðum kostnaði upp á allt að 47 milljarða króna.

Fjarðarheiðargöng verða 13,3 kílómetra löng. Svona á gangamunninn Seyðisfjarðarmegin að líta út.Vegagerðin/Mannvit

Í fréttum í gær var vitnað í fjármálaáætlun ríkisstjórnarinnar en þar segir að það sem upp á vantar muni koma úr gjaldtöku af umferð í jarðgöngum.

Sigurður Ingi Jóhannsson innviðaráðherra segir að horft sé til Færeyinga, sem stofnað hafi félag um jarðgangagerðina. Þar sé gjaldið haft nokkuð hátt, en samt hóflegt, á meðan menn borgi til baka nýjar fjárfestingar. Gjaldið sé síðan lækkað en það sé alltaf eitthvert gjald og segir ráðherrann að frumvarp um málið verði lagt fram á Alþingi í vetur.

Sigurður Ingi Jóhannsson innviðaráðherra.Sigurjón Ólason

„Það er fyrirhugað að hefja þá gjaldtöku í öllum göngum til þess að standa undir annarsvegar auknum rekstri þeirra, miðað við vegi, og hins vegar að búa til einhverskonar sjóðsstreymi til þess að standa undir framtíðar jarðgangagerð og þannig geta hugsanlega borað meira en ein göng í einu,“ segir Sigurður Ingi.

Íbúar á Seyðisfirði teljast núna vera 669. Það þýðir að 44 til 47 milljarða króna áætlaður kostnaður við Fjarðarheiðargöng verður á hvern íbúa á bilinu 66 til 70 milljónir króna eða um 200 milljónir á þriggja manna heimili í bænum.

„Já, þetta eru dýrar framkvæmdir. En engin spurning að þegar upp er staðið þá mun ávinningur samfélagsins verða gríðarlegur.“

Frá munna Múlaganga sem liggja á milli Ólafsfjarðar og Dalvíkur við utanverðan Eyjafjörð.Wikipedia Commons

Og það er víðar en af jarðgöngum sem ráðherrann boðar vegtolla, eins og af svokölluðum samvinnuleiðum.

„Og svo erum við að fara í að taka upp annarskonar gjaldtöku í umferðinni. Við erum að hætta með bensín- og dísilgjöld og fara í einhverskonar notkunargjöld. Þannig að þetta er allt liður í sömu breytingunni.“

En hvenær hefst gjaldtakan?

„Við þurfum þetta ár og fram á næsta til að undirbúnings. En síðan munum við kannski fara að sjá svona glitta í þessa breytingu á árinu 23 eða 4,“ segir Sigurður Ingi.

Hér má sjá frétt Stöðvar 2:

Vegtollar Vegagerð Samgöngur Byggðamál Múlaþing Dýrafjarðargöng Vaðlaheiðargöng Hvalfjarðargöng

Tengdar fréttir

Ný jarðgangagjöld áformuð til að greiða Fjarðarheiðargöng

Ríkið áformar að mæta ríflega helmingi 45 milljarða króna kostnaðar vegna Fjarðarheiðarganga með nýrri gjaldtöku af umferð um önnur jarðgöng í landinu. Samgöngufélagið segir að þetta gangi tæpast upp og að óforsvaranlegt sé að ráðast í útboð nema fyrir liggi með ótvíræðum hætti hvernig staðið verði að gjaldtökunni.

11. júlí 2022 22:10

Rúmur áratugur í Súðavíkurgöng samkvæmt áætlunum

Innviðaráðherra segir verið að skoða að stofna opinbert félag um jarðgangagerð að færeyskri fyrirmynd. Þannig yrði hægt í samvinnu við aðra að grafa göng á fleiri stöðum í einu með innheimtu veggjalds. Forgangsverkefnin í vegakerfinu séu mörg og brýn.

23. janúar 2022 20:36

Einkafjármögnun og veggjald fylgja nýrri Hornafjarðarbrú

Vegagerðin hefur boðið út smíði nýrrar brúar yfir Hornafjarðarfljót ásamt fjármögnun verksins. Þetta er fyrsta útboðið frá því sérstök lög voru samþykkt í fyrra sem heimila ríkinu að heimta vegtolla og semja við einkaaðila um fjármögnun samgönguframkvæmda.

22. júní 2021 22:22