Segjast ekki hafa brugðist illa við ákvörðun Þróttara

Í gær fóru lokaleikir N1-mótsins á Akureyri fram en á mótinu keppa drengir úr 5. flokki í knattspyrnu. Lið Þróttar í Reykjavík átti að spila leik um fimmta sætið við lið FH en mætti ekki til leiks. Þjálfari liðsins sagði ástæðuna vera að lið FH hafi ekki sýnt íþróttamannslega hegðun í leik fyrr á mótinu. Þá hafi mótsstjórn brugðist illa við því þegar Þróttarar tilkynntu að þeir ætluðu ekki að spila leikinn.

Þróttarar sendu frá sér yfirlýsingu á Twitter í gær þar sem félagið segist harma að ábyrgðaraðilar mótsins hafi ekki tekið strax á málunum. 

Sævar Pétursson, formaður KA og einn stjórnenda mótsins, segir það hafa verið lítið sem mótsstjórn gæti gert.

„Ég reyndar skil ekki hvað Doddi [þjálfari Þróttar] á við með því að við höfum brugðist illa við. Hann kemur inn og tilkynnir okkur þetta þegar leikurinn er að byrja, það mætir ekki Þróttara-lið til leiks. Við förum að spyrjast fyrir og þá tilkynnir hann þetta. Það er svo sem lítið sem við getum gert, ef þetta er þeirra ákvörðun þá hafa þeir fullan og frjálsan vilja til að taka þá ákvörðun. Það eina sem við segjum er að okkur þyki þetta leiðinlegt því þetta er að bitna á ellefu og tólf ára strákum sem eru að missa þarna einn leik úr sínu móti en styðjum þá ákvörðun,“ segir Sævar.

Á mótinu voru spilaðir um níu hundruð leikir og þykir Sævari leitt að af þeim öllum sé eini leikur mótsins sem ekki var spilaður það eina sem fólk talar um.

Aldrei gerst áður

Verið var að halda mótið í þrítugasta og sjötta skiptið en Sævar segir að það hafi aldrei gerst áður að lið neiti að spila leik.

„Það gerist á hverju ári að það koma upp einhver hitamál, þau voru sennilega færri í ár en oft áður.“

Þekkt er að foreldrar á íþróttamótum sem þessum séu æstari en börnin sjálf og eigi það til að missa sig á hliðarlínunni. Saga um slíkt foreldri fór í gang á samfélagsmiðlum í gær og átti foreldri að hafa öskrað ljótum orðum í átt að barni sem var að keppa.

„Raunveruleikinn er þannig að í hita leiksins þá var ellefu ára gutti sem sagði þetta við annan leikmann. Forsvarsmenn þess félags komu inn í mótsstjórn eftir leik og báðust afsökunar fyrir hönd félagsins,“ segir Sævar.

Komnir til að vera

Einhverjir hafa kallað eftir því að einfaldlega banna foreldra á fótboltamótum þar sem þeir setja of mikla pressu á keppendur. Sævar telur að öskrandi foreldrar sé vandamál sem er komið til að vera. Það sé ekki hægt að banna alla því sumir kunni ekki að haga sér.

Sævar segir að þrátt fyrir þetta leiðinlega atvik hafi mótið gengið vel í ár. 

„Mótið í ár gekk eiginlega fullkomlega upp fyrir okkur. Leikirnir gengu eins og í sögu, tíminn hélt og engar tafir. Við vorum heppin með veður, sumir segja að það sé alltaf þannig hjá okkur fyrir norðan. Ég held að yfir 99 prósent af þátttakendum og gestum séu yfir höfuð mjög ánægðir með mótið.“