Nýjar veiðitölur úr laxveiðiánum

Samantekt á veiðitölum fyrir júnímánuð fram til 29. júní liggur fyrir á vef Landssambands Veiðifélaga og það er svo sem ekki margt sem kemur þar á óvart. Urriðafoss er komin í 341 lax og miðað við hvað það gengur vel þar á bæ má reikna með að eftir viku eða tíu daga í viðbót verður 50% af heildarveiðitölu sumarsins 2021 náð og þá nokkuð líklegt að veiðin fari yfir 1.000 laxa í sumar á fjórar stangir sem er fantagóð veiði.

Þverá og Kjarrá hafa verið að koma til og þá sérstaklega Kjarrá en samanlögð veiði úr ánum er komin í 211 laxa. Norðurá er líka búin að eiga góðan sprett og er komin í 206 laxa. Haffjarðará er síðan í fjórða sæti með 123 laxa og óvænta útsplilið er svo að sjá Flókadalsá með 87  laxa og er hún þá með betri veiði hingað til en Miðfjarðará, Laxáí Leirársveit og Laxá í Kjós sem dæmi. Þær eiga nú líklega nóg inni svo þetta er bara eins og staðan er núna.

Vonbrigðin ennþá er kannski helst Blanda sem hefur bara náð 40 löxum í sumar og það er nokkuð vafalaust lélegasta veiðin sem hefur sést í þessari á. Listinn í heild sinni er inná www.angling.is