Vildi að dómsmálaráðuneytið segði kosningarnar spilltar

Linnulaus þrýstingur Trump á dómsmálaráðuneytið til að fá það til að taka undir stoðlausar ásakanir hans um að stórfelld kosningasvik hefðu verið í tafli í forsetakosningunum var viðfangsefni fimmta opna fundar þingnefndar fulltrúadeildar Bandaríkjaþings sem rannsakar árás stuðningsmanna Trump á þinghúsið 6. janúar í gær.

Áður hefur nefndin dregið upp mynd af því hvernigTrump og ráðgjafar hans lögðu á ráðin um leið til að halda í völdin þrátt fyrir að hann hefði tapað kosningunum fyrir Joe Biden. Ætlunin var að fá repúblikana á ríkisþingum þar sem Biden sigraði naumlega til þess að nota svikabrigslin sem átyllu til að hafna kjörmönnum ríkjanna og velja í stað þeirra kjörmenn fyrir Trump.

Liður í áætluninni var að fá Mike Pence, varaforseta, til þess að neita að staðfesta niðurstöðu kjörmannaráðsins sem velur forsetann eða jafnvel telja frekar fölsku kjörmenn Trump þannig að hann yrði áfram forseti. Pence neitaði að taka þátt en stuðningsmenn Trump réðust á þinghúsið til að reyna að koma í veg fyrir að hann staðfesti kosningaúrslitin 6. janúar í fyrra.

„Látið mig og repúblikana um afganginn“

Til að renna stoðum undir samsæriskenningar um kosningasvik vildi Trump ólmur að dómsmálaráðuneytið talaði sínu máli. 

Jeffrey Rosen, þáverandi starfandi dómsmálaráðherra, sagði þingnefndinni að Trump hefði haft samband við sig nær daglega í aðdraganda árásarinnar á þinghúsið. Dómsmálaráðuneytið á að vera óháð forsetanum. Rosen varð starfandi ráðherra eftir að William Barr hætti. Barr hafði sagt engar sannanir fyrir kosningasvikum.

Trump vildi að ráðuneytið drægi kosningaúrslitin í efa opinberlega. „Segið bara að kosningarnar hafi verið spilltar og látið mig og repúblikana um afganginn,“ hafði Richard Donoghue, þáverandi starfandi aðstoðardómsmálaráðherra, eftir Trump.

Rosen og Donoghue sögðu Trump að rannsókn ráðuneytisins hefði ekki leitt í ljós nein meiriháttar svik í kosningunum. Sumar ásakanir forsetans um svik væru „augljóslega út í hött“ og jafnvel „hrein sturlun“.

„Ef ráðuneytið hefði gripið inn í stjórnmálaferlið með þessum hætti tel ég að það hefði haft alvarlega afleiðingar fyrir landið. Við höfðum mjög auðveldlega getað endað í stjórnarskrárkreppu,“ sagði Donoghue við nefndina.

Hefði stýrt „kirkjugarði“

Andspyrna yfirmanna dómsmálaráðuneytisins fór svo í taugarnar á Trump að hann ætlaði sér að reka Rosen og skipa í staðinn Jeffrey Clark, tiltölulega lágt settan lögfræðing á umhverfissviði ráðuneytisins, sem ráðherra í hans stað.

Clark þessi hafði af eigin hvötum skrifað minnisblað, á bréfsefni ráðuneytisins, um hvernig ríkisþingmenn í ríkjum sem Trump tapaði gætu ógilt úrslit kosninganna þar.

Þegar Trump kallaði yfirmenn ráðuneytisins óvænt á fund í Hvíta húsinu þar sem hann viðraði hugmyndina um að skipa Clark ráðherra, þremur dögum fyrir árásina á þinghúsið, sögðust þeir allir myndu segja af sér. Donoghue varaði Trump við því að það leiddi til hundraða afsagna starfsmanna ráðuneytisins.

Undir það tók Steven A. Engel, þáverandi yfirmaður skrifstofu yfirlögfræðings ráðuneytisins. Yrði Clark skipaður ráðherra myndi hann „stýra kirkjugarði“.

Trump gaf hugmyndin loks upp á bátinn. Clark sjálfur neitaði að bera vitni fyrir þingnefndinni og nýtti sér rétt sinn til að bendla sjálfan sig ekki við glæp. Alríkislögregumenn gerðu húsleit á heimili hans í tengslum við rannsókn á tilraununum til að snúa kosningaúrslitunum við.

Þingmenn sóttust eftir forvirkum náðunum

Nefndin upplýsti einnig í gær að sex þingmenn Repúblikanaflokksins hefðu falast eftir því að Trump náðaði þá fyrir fram til að koma í veg fyrir að þeir yrðu sóttir til saka fyrir að styðja tilraunir forsetans til þess að snúa úrslitum kosninganna við.

Þingmennirnir sem um ræðir voru Mo Brooks frá Alabama, Matt Gaetz frá Flórída, Andy Briggs frá Arizona, Louie Gohmert frá Texas, Marjorie Taylor Green frá Georgíu og Scott Perry frá Pennyslvaníu.

Enginn þeirra hlaut þó náðun frá Trump áður en hann yfirgaf embætti.