Trump hunsaði ráð­gjafa og var „af­tengdur raun­veru­leikanum“

Vitnisburður nokkurra helstu ráðgjafa Trump var spilaður á opnum fundi nefndar fulltrúardeildar Bandaríkjaþings sem rannsakar árás stuðningsmanna Trump á þinghúsið í Washington-borg 6. janúar í fyrra. 

Þeir höfðu allir sömu sögu að segja: þeir hefðu reynt að segja forsetanum að hann hefði tapað forsetakosningunum og að engar trúverðugar vísbendingar væru um að brögð hefðu verið í tafli. Trump hafi hunsað þau ráð, hæðst að þeim og ýtt ráðgjöfunum til hliðar á síðustu vikum forsetatíðar sinnar.

Trump og bandamenn hans héldu fram fjarstæðukenndum kenningum um að stórfelld kosningasvik í nokkrum lykilríkjum hefðu kostað hann endurkjör. Dómarar vítt og breitt um Bandaríkin vísuðu lögmönnum Trump og íhaldshópa honum hliðhollum á dyr með þær ásakanir.

Lygar Trump og félaga um kosningarnar æstu stuðningsmenn hans þó svo upp að þeir brutust inn í þinghúsið og reyndu að koma í veg fyrir að þingmenn staðfestu úrslit forsetakosninganna 6. janúar 2021.

Sagði forsetanum að ásakanirnar væru þvættingur

William Barr, sem var dómsmálaráðherra á seinni hluta kjörtímabils Trump, sagði þingnefndinni að hann hefði snemma komist að þeirri niðurstöðu að ásakanir um að forsetakosningunum hefði verið „stolið“ væru „algerlega falskar og kjánalegar og byggðust yfirleitt á algeru upplýsingafalsi“.

Trump hafi þrátt fyrir það þrýst á Barr á fundum í nóvember og desember að beita dómsmálaráðuneytinu í sína þágu á grundvelli ásakananna. Barr sagðist hafa bent Trump á að fullyrðingar bandamanna hans um svik væru þvættingur.

Um miðjan desember hafi Barr komist að þeirri niðurstöðu að Trump væri „aftengdur raunveruleikanum“ ef hann tryði raunverulega svikabrigslunum. Barr sagði af sér 14. desember.

„Skoðun mín þá og nú er að kosningunum var ekki stolið með svikum og ég hef ekki séð neitt frá kosningunum sem hefur fengið mig til að skipta um skoðun,“ sagði Barr við nefndina, að sögn Washington Post.

„Venjulega liðið“ gegn liði Giuliani

Bill Stepien, fyrrverandi kosningastjóri Trump, átti að bera vitni á opnum fundi en forfallaðist. Þess í stað spilaði nefndin upptöku af framburði hans fyrir luktum dyrum. Þar sagði Stepien að nánustu ráðgjafar Trump hafi ráðlagt honum að lýsa ekki yfir sigri í kosningunum. Trump gerði það engu að síður þegar á kosninganótt.

Samkvæmt lýsingu Stepien tókust á tvær fylkingar í innsta hring Trump: annars vegar svokallað „venjulega liðið“ sem hann tilheyrði sjálfur og samþykkti kosningaúrslitin en hins vegar jámenn Trump sem neituðu að játa sig sigraða, að því er segir í frétt breska ríkisútvarpsins BBC.

Síðarnefnda liðið hafi síðar verið þekkt sem „liðið hans Rudys“ í höfuðið á Rudy Giuliani, persónulegum lögmanni Trump sem fór fremstur í flokki þeirra sem vildu snúa við úrslitum kosninganna á grundvelli stoðlausra samsæriskenninga.

Bæði Stepien og Jason Miller, fyrrverandi ráðgjafi Trump, báru vitni um að Giuliani hafi virst ölvaður á kosninganótt þegar hann vildi að Trump lýsti yfir sigri.

Dagana og vikurnar eftir kjördag fór Giuliani mikinn í fjölmiðlum og dómsal. Hann var meðal annars niðurlægður opinberlega þegar tilkynnt var um að allir helstu fjölmiðlar landsins hefðu lýst Joe Biden sigurvegara á miðjum skrautlegum blaðamannafundi sem hann hélt fyrir utan garðyrkjufyrirtæki í Fíladelfíu.

Milljónir trúðu lygunum

Enn eru fimm dagar eftir af opnum fundum þingnefndarinnar um árásina mannskæðu á þinghúsið. Fulltrúar hennar segja að Trump hafi borið ábyrgð á árásinni með því að dreifa ósannindum um kosningasvik gegn betri vitund.

Zoe Lofgren, þingmaður demókrata frá Kaliforníu, sagði að árásin hefði verið „bein og fyrirsjáanleg afleiðing af ákvörðun Trump um að nota fullyrðingar um kosningasvik til að snúa við úrslitum kosninganna og halda í völdin.“

„Hann sagði bandarísku þjóðinni ragnlega að kosningarnar hefðu ekki verið lögmætar, „meiriháttar svindl“ að hans sögn. Milljónir Bandaríkjamanna trúðu honum,“ sagði Liz Cheney, þingmaður repúblikana frá Wyoming sem var ein örfárra repúblikana sem greiddu atkvæði með því að kæra Trump fyrir embættisbrot vegna árásarinnar.