Stóra Laxá gæti fundið fyrir netaupptöku

Það er mjög spennandi að sjá hvaða áhrif þetta á eftir að hafa á laxgengd í árnar sem renna í Hvítá og ein af þeim ám sem á vonandi eftir að finna vel fyrir þessu er Stóra Laxá. Miklar breytingar eru að eiga sér stað við ána en þar hefur verið farið í framkvæmdir á veiðihúsinu sem kemur til með að fylgja svæðum 1-2-3 sem nú eru veidd saman.

Stóra Laxá er klárlega ein af fallegustu ám landsins og svæði 4 svo hreinlega stórbrotið á köflum að veiðimenn hafa átt það til að setjast bara niður og njóta í stað þess að kasta flugu. Veiðin í ánni hefur verið upp og ofan en bara við það eitt að laxinn komist upp ána en endi ekki í netum gæti breytt þeim sveiflum sem oft verða nokkuð miklar í Stóru.

Það hefur lengi verið talað um að það séu tveir laxastofnar í henni. Annar er greinilega mjög snemmgengin og rýkur beint upp á efri svæðin þegar hann mætir í ána en það er veæ þekkt að flest árin sem Sróra Laxá opnar veiðast fyrstu og stærstu laxarnir á svæði 4. Þetta snýst svo við þegar líður á sumarið en þá virðist annar stofn mæta sem leggst á veiðistaðina sem eru á svæði 1-2-3. Nú þegar laxinn á meiri möguleika á að komast óhindrað sína leið verður gaman að sjá hvað gerist í Stóru Laxá.