Nýjar vikutölur úr laxveiðiánum

Nýjar vikutölur voru birtar á miðvikudagskvöldið á vef Landssambands Veiðifélaga yfir veiðina í laxveiðiánum og það sýnir vel hversu erfið staðan er.

Það sem helst er að gerast er að Eystri Rangá er að taka vel við sér eins og hún gerir venjulega um miðjan júlí en heildarveiðin í ánni er komin í 685 laxa og það er mikið af laxi að ganga í ánna. Urriðafoss er komin í 560 laxa og þar er veiðin nokkuð jöfn og góð en þar er farið að bera meira á smálaxi sem gleður marga. Miðfjarðará er búin að gefa 370 laxa en þar eru veiðimenn að glíma við mjög erfiðar aðstæður í vatnsleysinu sem plagar margar árnar á landinu.

Ytri Rangá er komin í 291 lax og þar er líka aðeins að lifna yfir veiðinni en fyrstu smálaxagöngurnar eru farnar að sýna sig í ánni. Blanda er svo í fimmta sæti á listanum með 261 lax sem er langt frá þvi sem veiðimenn þar eiga að venjast. Tölurnar úr ánum á vesturlandi eru áfram lágar og endurspegla skort á smálaxi í ánum en aðallega vatnsleysi sem er orðið svo slæmt að árnar margar hverjar renna varla milli hylja. Það er því miður ekki útlit fyrir rigningu af þeirri stærðargráðu sem þarf til að breyta þessu í bráð svo það verður alla vega erfitt í næstu sjö til tíu daga í þessum ám.