Í­hugaði að hætta en fékk svo risa­samning

Hinn 31 árs gamli Aaron Donald hefur verið með betri varnarmönnum NFL-deildarinnar undanfarin ár og í raun einn besti varnarmaður deildarinnar frá upphafi. 

Hann var hreint út sagt magnaður er LA Rams varð meistari fyrr á árinu og þá sérstaklega í úrslitaleiknum gegn Cincinnati Bengals. Það kom því verulega á óvart þegar hann gaf það út að mögulega færu skórnir á hilluna.

Ef til vill var varnarmaðurinn að leggja út beitu í von um að Hrútarnir frá Los Angeles myndu gera allt sem í þeirra valdi stæði til að halda honum hjá félaginu. Það gekk eftir þar sem Aaron Donald er nú launahæsti leikmaður í sögu deildarinnar ef leikstjórnendur eru frátaldir.

Á næstu þremur árum mun Donald fá 40 milljónum Bandaríkjadala meira en upphaflega stóð til. Nýr samningur hans gefur honum 31,7 milljón Bandaríkjadala í árslaun eða rétt rúmlega fjóra milljarða íslenskra króna.

„Hann vann inn fyrir þessu. Hann er einstakur í alla staði,“ sagði Sean McVay, þjálfari Rams um nýjan samning Donald.

Með því að halda Aaron Donald ánægðum þá er ljóst að LA Rams er til alls líklegt á næstu leiktíð sem hefst þann 8. september næstkomandi.