Strunsaði út úr við­tali þegar hann var spurður um land­lægar skot­á­rásir í Banda­ríkjunum

Spurningar og deilur um skotvopnaeign og löggjöf um hana geisa nú enn og aftur vestanhafs eftir að ungur maður skaut nítján grunnskólabörn og tvo kennara til bana í Robb-grunnskólanum í Uvalde í Texas.

Sem fyrr leitar umræðan í sömu skotgrafir og í tifelli ógrynni annarra skotárása sem hafa slegið bandarísku þjóðina tímabundið undanfarin og ár og áratugi. Demókratar leggja fram tillögur um að herða vopnalöggjöfina en repúblikanar mótmæla því og halda því fram að engin lög og reglur geti komið í veg fyrir að andlegi veikir einstaklingar fremji slík ódæði.

Minningarstund um fórnarlömb skotárásarinnar í Uvalde var haldin á miðvikudagskvöld en Ted Cruz, annar öldungadeildarþingmanna Texas og repúblikani, var á meðal viðstaddra. Myndband af viðtali hans við Sky News þar hefur farið á mikið flug á netinu.

Mark Stone, fréttamaður Sky, spurði Cruz fyrst hvort nú væri rétti tíminn til að breyta skotvopnalöggjöfinni. Cruz gaf lítið fyrir það og sagði auðvelt að leiðast út í pólitík á þessari stundu. Stone þrýsti áfram á þingmanninn og benti á að lögin væru grundvallaratriði í málinu og að margir þeirra sem voru viðstaddir minningarathöfnina hafi talað sérstaklega um það.

Byrjaði Cruz að gagnrýna tillögur sem demókratar settu fram í hvert skipti sem „geðsjúklingur“ myrti fólk en Stone stöðvaði hann og benti á hversu auðvelt það hefði verið fyrir átján ára byssumanninn í Uvalde að kaupa sér tvo hríðskotariffla.

„Ef þú ætlar að stöðva ofbeldisglæpi hefðu engar tillögur demókrata dugað til að koma í veg fyrir þetta,“ sagði Cruz á móti.

„Hættu að vera áróðursmeistari“

Spennan á milli Cruz og fréttamannsins hafði farið stigmagnandi en upp úr sauð þegar Stone spurði út í sérstöðu Bandaríkjanna í heiminum hvað varðaði blóðugar skotárásir sem þessar.

„Hvers vegna gerist þetta bara í þínu landi? Hvers vegna bara í Bandaríkjunum? Hvers vegna er þessi bandaríska sérstaða (e. exceptionalism) svona hræðileg?“ sagði Stone.

Cruz virtist annað hvort misskilja spurninguna eða snúa út úr henni. Sérstaða Bandaríkjanna (e. American exceptionalism) er rótgróin hugmynd vestanhafs um að landið sé einstakt í sögu mannkynsins og virtist Cruz taka spurningunni sem svo að Stone fyndist hún hræðileg.

„Veistu hvað, mér þykir leitt að þér finnist bandarísk sérstaða hræðileg. Þú ert með pólitískt markmið. Guð elski þig,“ sagði Cruz og gekk í burtu.

Stone og annar fréttamaður þráspurðu Cruz hvers vegna skotárásir sem þessar ættu sér aðeins stað í Bandaríkjunum.

„Hvers vegna kom fólk alls staðar að í heiminum til Bandaríkjanna? Vegna þess að þau eru frjálsasta, mest velmegandi og öruggasta land á jörðinni. Hættu að vera áróðursmeistari,“ hreitti Cruz í fréttamann Sky.

Vill skotheldar dyr og rúður í skóla

Hátt á þriðja hundrað meiriháttar skotárásir hafa verið gerðar í Bandaríkjunum frá árinu 2009, að því er segir í frétt Washington Post. Í þeim hafa 1.536 manns verið skotnir til bana og 983 særðir.

Talsmaður Cruz hélt því fram við blaðið að spurningar Stone hefðu byggst á rangindum. Vísaði hann í tölur samtaka sem eru hlynnt skotvopnaeign sem eiga að sýna að fjöldi meiriháttar skotárása á opinberum stöðum í Bandaríkjunum sé vel undir meðaltali á heimsvísu.

Lausnirnar sem Cruz sjálfur hefur lagt til eftir skotárásina í Uvalde er meðal annars að koma fyrir skotheldum hurðum og rúðum í skólum. Þá vill hann aðeins einn útgangur verði á skólabyggingum að vopnaðir lögreglumenn gæti þeirra.