Fer fram á ómerkingu ummæla Huga og eina og hálfa milljón í miskabætur

Í byrjun maí í fyrra ýjaði Hugi að því í hlaðvarpsþættinum sáluga, The Mike Show, að Stojanovic hefði verið flæktur í veðmálasvindl og fyrir leik gegn Njarðvík, sem tapaðist 97-75, hafi verið haldinn krísufundur þar sem rætt var við hann.

Þórsarar vísuðu ummælum Huga til föðurhúsanna og sögðu ekkert hæft í þeim. „Að nafngreina og ásaka leikmann opinberlega í fjölmiðlum án þess að hafa fyrir sér nokkur sönnunargögn kallar á að viðkomandi einstaklingur muni leita réttar síns með tilliti til meiðyrðamáls enda ásökunin grafalvarleg og ætti ekki á nokkurn hátt að vera tekið léttvægt,“ sagði meðal annars í yfirlýsingunni.

Daginn eftir þáttinn baðst Hugi afsökunar á ummælum sínum. Hann sagðist harma að hafa gefið í skyn að Stojanovic hafi verið flæktur í veðmálasvindl og dreginn inn í umræðuna.

Ummælin hafa dregið dilk á eftir sér en Stojanovic hefur stefnt Huga fyrir Héraðsdóm Reykjaness fyrir meiðyrði. Fyrirtaka í málinu var í síðustu viku.

„Þetta snýst um ummæli sem féllu í hlaðvarpsþætti í maí í fyrra þar sem komu fram ásakanir um að minn umbjóðandi hafi verið viðriðinn einhvers konar veðmálasvindl. Þessar fullyrðingar voru algjörlega úr lausu lofti gripnar og ekki studdar neinum gögnum,“ sagði Gunnar Ingi Jóhannsson, lögmaður Stojanovic, í samtali við Vísi í dag.

Hafa skaðað ferilinn

„Það birtust einhvers konar drög að afsökunarbeiðni, leiðréttingu eða hvað á að kalla það, af hálfu þessa aðila sem viðhafði þessi ummæli. Samt var látið í það skína að eitthvað væri til í þessu,“ sagði Gunnar. 

„Minn umbjóðandi fann sig knúinn til að höfða meiðyrðamál og fá þessi ummæli dæmd dauð og ómerk enda hafa þau skaðað feril hans sem körfuboltamanns. Enginn vill hafa mann í vinnu sem er grunaður um veðmálasvindl þannig að það var nauðsynlegt að fá þessi ummæli dæmd dauð og ómerk.“

Auk þess að fá ummælin dauð og ómerk fer Stojanovic fram á eina og hálfa milljón króna í miskabætur.

Aðspurður segist Gunnar ekki gera ráð fyrir því að að aðalmeðferð í málinu fari fram fyrr en í haust, í kringum mánaðarmótin ágúst september.

Stojanovic var með 15,6 stig, 3,9 fráköst og 2,9 stoðsendingar að meðaltali með Þór á síðasta tímabili. Þar áður lék hann með Fjölni um tveggja ára skeið.