Sveindís bjó til bæði mörkin er Wolfsburg tryggði sér sæti í undanúrslitum

Landsliðskonan Sveindís Jane Jónsdóttir og stöllur hennar í Wolfsburg unnu 2-0 sigur gegn Arsenal í síðari leik liðanna í átta liða úrslitum Meistaradeildar Evrópu í kvöld. Fyrri leik liðanna lauk með 1-1 jafntefli og Wolfsburg fer því áfram eftir samanlagðan 3-1 sigur.

Jill Roord kom heimakonum í Wolfsburg í forystu með marki eftir rétt tæplega tíu mínútna leik. Sveindís Jane náði þá að koma boltanum til hennar eftir darraðardans í teignum og Roord kom boltanum í netið.

Staðan var því 1-0 þegar flautað var til hálfleiks, en heimakonur tvöfölduðu forystuna þegar rúmlega stundarfjórðungur var til leiksloka. Sveindís Jane fékk þá boltann úti á vinstri kantinum og keyrði upp að endalínu. Leah Williamson kom sér fyrir fyrirgjöf Sveindísar, en varð þá fyrir því óláni að setja boltann í eigið net og staðan því orðin 2-0.

Þetta reyndist seinasta mark leiksins og niðurstaðan varð því samanlagður 3-1 sigur Wolfsburg. Sveindís og stöllur hennar eru komnar í undanúrslit þar sem liðið mætir ríkjandi meisturum í Barcelona. Fyrri leikur liðanna fer fram helgina 23. og 24. apríl.

Leikurinn var í beinni útsendingu á Youtube og má sjá hann í spilaranum hér fyrir neðan.