Kanye West og Julia Fox hætt saman

Frá þessu greina hinir ýmsu bandarísku slúðurmiðlar. Í umfjöllun TMZ kemur fram að parið fyrrverandi hafi hætt saman á góðum nótum og séu raunar enn góðir vinir.

Þó nú hafi fengist staðfest að sambandi þeirra Kanye og Fox sé lokið liggur ekki nákvæmlega fyrir hvenær þau hættu saman.

Kanye fer mikinn á ýmsum sviðum

Kanye hefur verið mikið í sviðsljósinu að undanförnu, en hann hefur boðað útgáfu nýrrar plötu úr sinni smiðju í þessum mánuði. Platan sem um ræðir heitir Donda 2, en platan Donda kom út á haustmánuðum síðasta árs og naut gríðarlegra vinsælda.

Athyglin sem tónlistarmaðurinn hefur fengið að undanförnu snýr þó einkum og sér í lagi að hegðun hans á samfélagsmiðlum. Hann virðist nefnilega vera með Pete Davidson, kærasta Kim Kardashian, á heilanum. Kardashian er fyrrverandi eiginkona Kanye.

Um helgina birti Kanye til að mynda tugi færslna á Instagram-síðu sinni þar sem hann fór ófögrum orðum um Davidson og meint svik hinna ýmissa þekktra tónlistarmanna í sinn garð.

Kanye hefur verið nokkuð opinskár um þau geðrænu vandamál sem hann hefur átt við að stríða, en hann opnaði sig um þau árið 2018 og sagði frá því að hann hefði greinst með geðhvarfasýki.