Bolton heldur áfram að klífa upp töfluna eftir komu Jóns Daða

Billy Bodin kom heimamönnum í Oxford yfir strax á níundu mínútu leiksins, en Declan John jafnaði metin aðeins mínútu síðar.

Billy Bodin var aftur á ferðinni fyrir Oxford eftir rúmlega hálftíma leik, en aftur jöfnuðu gestirnir í Bolton. Í þetta skipti var það Marlon Fossey stuttu fyrir hálfleik og staðan var því 2-2 þegar gengið var til búningsherbergja.

Jón Daði Böðvarsson kom inn af varamannabekknum á 78. mínútu, en sigurmark Bolton skoraði Amadou Bakayoko tæpum fimm mínútum fyrir leikslok.

Niðurstaðan varð því 3-2 sigur Jóns Daða og félaga, en liðið hefur ekki tapað leik síðan að landsliðsmaðurinn gekk til liðs við félagið. Bolton situr nú í tíunda sæti deildarinnar með 45 stig eftir 31 leik, átta stigum á eftir Oxford sem situr í sjöunda sæti.