Sól­veig Anna fær ís­kaldar kveðjur frá Agnieszku Ewu

Grein Agnieszku, sem birtist á Vísi nú undir hádegisbil, hlýtur að teljast þungt högg fyrir Sólveigu Önnu en Agnieszka var varaformaður í tíð Sólveigar en tók svo við af þegar Sólveig Anna sagði sig frá formennskunni eftir verulegar væringar á skrifstofu Eflingar.

Vert er í þessu sambandi að minna á Pallborðið sem verður á Vísi í beinni klukkan tvö á eftir en þá takast formannsefnin á; þau Sólveig Anna, Ólöf Helga og Guðmundur Baldursson.

Óbilgirni Sólveigar Önnu

Grein Agnieszku birtist á pólsku, ensku og íslensku sem skýrist vitaskuld af því að félagsmenn Eflingar eru af ýmsu þjóðerni. 

Agnieszka lýkur upp miklu lofsorði á Ólöfu en hún hefur ekki eins góða sögu að segja af Sólveigu; segir hana hafa lyft Grettistaki en síðan hafi farið að halla undan fæti. Og nú sé svo komið að hún sé ekki rétta manneskjan til að leiða baráttuna áfram. Hún hafi sýnt það með óbilgirni og vangetu til að hlusta á raddir annarra en sína eigin:

„Þrátt fyrir að baráttuorð hennar tali um mikilvægi samstöðu þá sýna gjörðir hennar að sú samstaða sem hún kallar eftir er í raun aðeins blind hollusta og jafnvel það dugar varla til því hún hefur einangrað sig frá flestum þáttum starfseminnar og blandar nær aldrei geði við fólkið á gólfinu sem er helst í sambandi við félagsfólk og þekkir helst þann vanda sem verkalýðsfélögin glíma við. Ef stjórnandi á öðrum vinnustað en Eflingu myndi hegða sér með þessum hætti yrði það litið alvarlegum augum,“ skrifar Agnieszka. 

Sundrung blasi við verði Sólveig formaður

Og hún heldur áfram og sýnir hvorki Sólveigu Önnu né Viðari Þorsteinssyni, fyrrverandi framkvæmdastjóra Eflingar, neina miskunn.

„Á þremur árum hafa stjórnarhættir Sólveigar og Viðars Þorsteinssonar kostað Eflingu gífurlegar fjárhæðir og mikinn mannauð. Baráttuhugurinn er til staðar í hreyfingunni, en Sólveig er sjálf orðin málsvari sundrungar.“

Agnieszka segir að í náinni framtíð muni reyna verulega á styrk verkalýðshreyfingarinnar til að takast á við mikilvæg verkefni sem standa fyrir dyrum: „Sundrung verkalýðsforystunnar eins og stefnir í ef Sólveig verður í forystu Eflingar, mun veikja stöðu félagsmanna okkar og alls verkafólks á landinu og með henni mun Efling einangrast.“