Tíu leikmenn Bolton björguðu stigi

Ekkert var skorað í fyrri hálfleik og því var staðan 0-0 þegar gengið var til búningsherbergja. Það dró þó til tíðinda á 69. mínútu þegar Ricardo Santos fékk að líta beint rautt spjald fyrir að koma í veg fyrir opið marktækifæri.

Heimamenn í Morecambe nýttu liðsmuninn fjórum mínútum síðar þegar Cole Stockton skoraði eftir stoðsendingu frá Adam Phillips.

Á 88. mínútu þurfti að gera hlé á leiknum þar sem Ian Evatt, þjálfari Bolton, missti stjórn á skapi sínu. Evatt virtist vera gjörsamlega brjálaður út í eitthvað sem hann heyrði frá stuðningsmönnum Morecambe.

Leikurinn hélt þó loks áfram og á fimmtu mínútu uppbótartíma jafnaði varamaðurinn Amadou Bakayoko metin fyrir Bolton og tryggði liðinu um leið eitt stig.

Bolton situr nú í 11. sæti deildarinnar með 39 stig eftir 29 leiki, tíu stigum meira en Morecambe sem situr í 21. sæti.