„Ætla ekki að nota orkuna í að horfa á þennan leik“

Guðmundur er enn staðráðinn í að sleppa því að horfa á leikinn í kvöld þrátt fyrir að eftir sigur Íslands á Svartfjallalandi í dag sé ljóst að ef Danmörk vinnur þá kemst Ísland í undanúrslit.

Hann ætlar að reyna að hvílast eftir mikla rússíbanareið síðustu sólarhringa, en Guðmundur þurfti til að mynda að breyta um leikáætlun snemma í morgun fyrir leikinn við Svartfjallaland, þegar þrír leikmenn losnuðu úr einangrun. Nýja áætlunin svínvirkaði og Ísland vann stórsigur.

„Ég á varla orð til að lýsa þessu. Þetta er búið að vera mjög, mjög erfitt fyrir okkur. Þetta er eins og krísustjórnun. Við erum í erfiðri stöðu á hverjum einasta degi og fyrir mig sem þjálfara, að undirbúa liðið í þessum aðstæðum hefur þetta verið geysilega erfitt og mikið púsluspil. Ég þurfti að breyta öllu leikplaninu klukkan hálfátta í morgun, þegar nýir menn voru komnir inn,“ sagði Guðmundur.

Finn svo til með þeim sem að geta ekki verið með

Hann var hæstánægður með þá Bjarka Má Elísson, Elvar Örn Jónsson og Aron Pálmarsson sem sneru aftur til leiks. Aron meiddist þó snemma leiks en Guðmundur segir vonir bundnar við að hann geti spilað á föstudaginn, um 5. sæti eða í undanúrslitum gegn Spáni.

„Ég vil þakka þeim sem komu inn eftir sjö daga í einangrun fyrir stórkostlega frammistöðu, karakter og vilja. Þetta var ekki einfalt fyrir þá en þeir gerðu það stórkostlega vel.

Ég finn svo til með þeim sem að geta ekki verið með okkur. Ég veit að þá langar svo ofboðslega til að spila hérna með okkur. Ég finn til með þeim á hverjum einasta degi. Þetta er ekki einföld staða, að vera lokaður inni í litlu herbergi á meðan að EM er í gangi.“

„Ég vona að við fáum happadísirnar með okkur núna og getum losað fleiri úr einangrun á næstu tveimur dögum. Þetta gekk upp í dag en þetta er lítill hópur til að halda uppi fullum dampi á móti toppliðum. Að því sögðu er ég ótrúlega ánægður með frammistöðu þeirra sem voru að koma inn í liðið. Þeir hafa verið fljótir að setja sig inn í hlutina og ég held ég hafi bara ekki upplifað svona,“ sagði Guðmundur.

Hæstánægður með nýju mennina

Þráinn Orri Jónsson og Magnús Óli Magnússon fengu til að mynda frekar stórt hlutverk í leiknum gegn Svartfjallalandi í dag.

„Þeir koma inn í vel skipulagt leikplan, þetta er skilgreint fyrir þeim aftur og aftur, og þeir eru bara með þetta. Þeir stóðu sig ótrúlega vel í dag. Maður eins og Þráinn kemur inn í sinn fyrsta landsleik á EM og gerði þetta mjög vel í vörn og sókn. Magnús Óli var með frábæra innkomu og hjálpaði okkur mikið, því staðan er aldrei örugg þegar þetta er komið niður í sex mörk. Hann hjálpaði okkur að leysa hnúta.“