Stílhreinir blómapottar sem breyta heimilinu og garðinum

Blómapottar úr trefjasteypu frá Steypustöðinni rjúka nú út eins og heitar lummur enda frábær lausn fyrir íslenskar aðstæður.

„Þessi blómapottar endast í áraraðir og þurfa lítið sem ekkert viðhald,“ segir Viðar Hreinn Olgeirsson, sölustjóri hella og garðlausna hjá Steypustöðinni. „Þeir henta bæði úti og inni og setja mikinn svip á pallinn eða innkeyrsluna og heimilið, enda mjög stílhreinir og flottir. Trefjasteypan er létt og pottarnir eru meðfærilegir og hæfilega þungir en efnið er til þess gert að standast allar veðuraðstæður. 

Við erum með yfir 20 tegundir í mismunandi litum og stærðum. Litirnir eru í grárri og fínni steypuáferð og einnig svarta og hvíta með glansáferð,“ segir Viðar en pottarnir eru í mörgum formum.

Pottarnir eru heilir en með þeim fylgja leiðbeiningar um hvernig má gera drengöt í botninn. Tilvalið er að nota skrautmöl ofan í pottana en skrautmölin fæst einnig hjá Steypustöðinni.