Aron Einar settur út í kuldann áður en kæra lá fyrir

Líkt og greint hefur verið frá var Aron Einar ekki valinn í landsliðshópinn sem mætir Armeníu og Liechtenstein síðar í þessum mánuði. Hann sendi frá sér yfirlýsingu í kjölfarið og sagði að um væri að ræða útilokunarmenningu KSÍ og að sögusagnir einar og sér hafi ráðið valinu.

Lögreglurannsókn á hendur honum og öðrum knattspyrnumanni, fyrrverandi landsliðsmanni, er hins vegar hafin en kæran snýr að meintu kynferðisbroti þeirra tveggja gagnvart íslenskri konu í Kaupmannahöfn árið 2010.

Ekki hafa fengist upplýsingar frá KSÍ um máli það sem af er degi. Geir Þorsteinsson, sem var formaður KSÍ, á þeim tíma segist í samtali við fréttastofu ekkert heyrt af málinu fyrr en í fjölmiðlum nú nýverið og þá hefur Ólafur Jóhannesson, fyrrverandi landsliðsþjálfari, ekki svarað fyrirspurnum fréttastofu. Vanda Sigurgeirsdóttir hyggst taka afstöðu til málsins eftir að hún verður formlega kjörin formaður KSÍ á aukaþingi sambandsins klukkan 11 á morgun.