Leik­fær Jóhann Berg segir ís­lenska liðið þurfa að hlaupa úr sér lungun

„Leikurinn á móti Rúmeníu var ágætur svo sem, við þurfum að skora mörk til að breyta leikjum. Við hefðum þurft að ná í 1-0 og þá hefði þetta verið allt annar leikur. Svo fáum við á okkur tvö léleg mörk en ið vitum það alveg að við eigum að gera betur. Þetta er nýtt lið og nýir leikmenn að læra inn á þetta allt saman og það tekur tíma,“ sagði Jóhann Berg um 0-2 tapið gegn Rúmeníu.

„Leikurinn gegn Norður-Makedóníu var hreinlega ekki góður í 70 mínútur. Við höfum farið yfir það allt saman en við fengum líka færi þar og eins og ég segi, við þurfum að skora mörk. Síðustu 20 voru mjög góðar og það er eins og Ísland á að spila, það er hlaupið úr sér lungun og ekkert gefið eftir. Við þurfum að gera það á morgun, klárlega,“ sagði vængmaðurinn öflugi um 2-2 jafnteflið í síðasta leik.

Um unga leikmenn sem eru að fá tækifærið nú

„Þetta er mikið af leikmönnum að koma inn. Venjulega eru þetta 1-2 að koma inn og þá er auðveldara að koma inn í þetta. Þetta er erfiðara nú þegar það eru svona margir og eru að læra inn á nýtt getustig, þetta er hærra getustig en þeir hafa spilað á. Þeir verða samt fljótir að læra, þetta eru allt mjög góðir fótboltamenn og þeir koma inn í þetta á einhverjum tímapunkti og hafa verið að gera það mjög vel. Við höldum því bara áfram.“

„Maður vill auðvitað alltaf vera með sitt sterkasta lið og það eru auðvitað leikmenn sem eru ekki hér. Það þýðir ekkert að hugsa um það, það er bara áfram gakk. Þeir leikmenn sem mæta þeir spila en við vitum alveg að við viljum gera betur í þessum riðli, sérstaklega upp á annað sætið þá var mikill möguleiki og við höfum ekki gert nógu vel en það er bara að lýta fram veginn og gera betur,“ sagði Jóhann Berg Guðmundsson að endingu.

Reikna má með að Jóhann Berg verði í byrjunarliði Íslands gegn Þýskalandi í kvöld. Leikurinn hefst klukkan 18.45 og verður í beinni textalýsingu hér á Vísi. Að leik loknum verður einnig umfjöllun um leikinn, einkunnir og viðtöl.