Van Gaal ekki hrifinn af For­múlu 1: „Bara mieeeeuw, mieeeeuw“

Max Verstappen vann sigur á Zandvoort-brautinni í Hollandi um helgina og tók þar með forystuna í stigakeppni ökumanna um heimsmeistaratitilinn. Hann er nú þremur stigum á undan Lewis Hamilton.

Í myndbandi af æfingu liðsins má sjá er Van Gaal kemur að Frenkie De Jong, miðjumanni hollenska landsliðsins og Barcelona, þar sem hann virðist hafa verið að ræða sigur Verstappen og áhuga sinn á Formúlu 1 við liðsfélaga sína.

Van Gaal var ekki sama sinnis og virðist ekki hafa mikinn áhuga á kappakstri eins og heyra má í kostulegu myndskeiði hér að neðan.

„Finnst þér þetta virkilega skemmtilegt, kappakstur? Mér finnst það ekki, ég horfi ekki einu sinni á þetta. Alltaf bara: mieeeuw, mieeeuw,“ sagði Van Gaal með tilþrifum.

Sama hvað Van Gaal finnst um áhorf De Jong á kappakstur þá má reikna með að leikmaðurinn verði í byrjunarliði Hollands er Tyrkir mæta í heimsókn á Johan Cruyff-leikvanginn í Amsterdam í kvöld. Um er að ræða toppslag G-riðils í undankeppni HM 2022.