„Guardiola, Klopp og Tuchel gætu gert United að meisturum“

United gat ekki fylgt eftir góðum 5-1 sigri sínum á Leeds United í fyrstu umferð ensku úrvalsdeildarinnar er liðið gerði 1-1 jafntefli við Southampton um helgina. Liðið leit ekkert sérstaklega út og breyttist umræðan um liðið snarlega eftir mikið lof fyrir viku síðan.

Neville kallaði eftir því í þættinum að United legði allt kapp á að fá Harry Kane, framherja Tottenham Hotspur, til liðsins ef það ætlaði sér að keppa um titla. Mikið hefur verið rætt og ritað um framtíð Kane í sumar en Manchester City hefur sérstaklega verið orðað við kappann sem fer ekki frá Spurs fyrir minna en 150 milljónir punda.

Eins og svarið sé alltaf að eyða 100 milljónum

Jamie Carragher svaraði Neville þar sem hann benti á að United væri með feykilega sterkan hóp og að betri knattspyrnustjóri en Ole Gunnar Solskjær gæti gert betri hluti með liðið. Svarið sé ekki alltaf að kaupa leikmenn.

„Mér finnst eins og í hvert skipti sem ég hlusta á Gary [Neville], Roy [Keane] eða stuðningsmenn Manchester United, sé svarið alltaf að eyða 100 milljónum punda í einhvern. Það er alltaf svarið við vandamálum félagsins að fara beint á markaðinn. Þú talar um að Chelsea hafi keypt Romelu Lukaku og allt í einu eftir úrslit gærdagsins þá eru allir farnir að tala um að Chelsea verði í titilbaráttunni við Manchester City,“ sagði Carragher.

„Manchester United endaði fyrir ofan Chelsea á síðustu leiktíð. Síðan keypti liðið bæði Varane og Sancho. Ég fæ ekki þessa tilfinningu að Manchester United geti ekki keppt á toppnum. Mér líður eins og ef Pep Guardiola, Jurgen Klopp eða jafnvel Thomas Tuchel væru með leikmannahóp Manchester United gætu þeir unnið titilinn.“ sagði Carragher einnig en United eyddi yfir 100 milljónum í þá Jadon Sancho og Raphael Varane í sumar.

Carragher segir þá jafnframt að United geti ekki sætt sig við baráttu um Meistaradeildarsæti heldur eigi að sækja að titlinum ef litið sé til peninganna sem félagið hefur eytt síðustu ár. Ekki eigi að bera liðið saman við Liverpool í því samhengi, heldur frekar Chelsea og Manchester City þar sem United hafi eytt peningum á pari við þau lið.

United reynt að fara þá leið án árangurs

Neville svaraði ummælum Carraghers: „Þegar þú nefnir að ef Pep væri þarna eða Jurgen Klopp eða Tuchel. Manchester United fékk inn tvo heimsklassa þjálfara í Louis van Gaal og José Mourinho og það fór hrikalega og gekk ekki upp. Svo þeir hafa reynt að fara þá leið en það gekk ekki upp.“

„Manchester United eyddi himinháum fjárhæðum undir þessum tveimur stjórum og það gekk ekki upp svo félagið breytti um stefnu. Liðið mun missa Anthony Martial og Edinson Cavani á næstu tólf mánuðum og mun þá aðeins hafa Mason Greenwood sem framherja, Rashford er vinstra megin, svo þá vantar framherja á næstu tólf mánuðum.“

„Að fá Kane inn í þetta lið myndi breyta öllu,“ sagði Neville.

Neville segir að Solskjær þurfti enn að sanna sig sem stjóri og úrslitaleikurinn í Evrópudeildinni í vor hafi verið sérstaklega slakur. Solskjær á enn eftir að vinna verðlaun með liðinu þrátt fyrir að hafa náð góðum árangri í stjórasætinu. Neville segir hann eiga skilið lágmark tólf til 18 mánuði með félagið.

Umræðuna má sjá í spilaranum að ofan.