Valskonur koma brosandi heim eftir góðan sigur á Zürich

Það var ljóst fyrir leikinn að hvorugt liðið gat komist áfram í aðra umferð en úrslitaleikurinn í riðlinum er seinna í kvöld á milli Hoffenheim og AC Milan.

Fanndís Friðriksdóttir kom inn í byrjunarliðið og kom Valsliðinu síðan í 1-0 á 32. mínútu leiksins og þannig var staðan í hálfleik.

Bandaríski framherjinn Cyera Hintzen skoraði tvö mörk með tveggja mínútna millibili í upphafi seinni hálfleiksins og eftir það voru úrslitin nánast ráðin.

Naomi Mégroz minnkaði muninn fyrir svissneska liðið á 59. mínútu en nær komust þær svissnesku ekki.

Zürich endaði í öðru sæti í svissnesku deildinni á síðasta tímabili alveg eins og Valskonur hér heima í fyrrasumar. Valsliðið er aftur á móti komið með níu fingur á Íslandsmeistaratitilinn í ár enda með sjö stiga forskot á Breiðablik þegar aðeins níu stig eru eftir í pottinum.

Líkt og í undanúrslitaleiknum sem tapaðist á móti Hoffenheim þá voru þær Elín Metta Jensen og Mary Alice Vignola á bekknum en báðar hafa verið að glíma við meiðsli.

Vignola kom inn á sem varamaður átta mínútum fyrir leikslok um leið og Valsmenn skiptu um markmann. Hin unga Fanney Inga Birkisdóttir fékk þá að spila sinn fyrsta Evrópuleik. Elín Metta spilaði ekki.

Lára Kristín Pedersen varð líka að fara meidd af velli eftir aðeins ellefu mínútna leik.

Valsliðið á eftir þrjá leiki á mótinu og einn sigur í viðbót tryggir liðinu endanlega Íslandsmeistaratitilinn. Næsti leikur í Pepsi Max deildinni er á móti Tindastól á miðvikudaginn kemur.