„Við megum ekki beita þeim að­ferðum sem endanlega koma okkur öllum í gröfina“

„Ég held að næsta vika eða svo komi til með að vera mjög þrungin af upp­lýsingum fyrir okkur. Vegna þess að ansi margir af þeim sem hafa smitast hafa verið bólu­settir og við vitum raun­veru­lega ekki hversu stór hundraðs­hluti af þeim verður raun­veru­lega lasinn,“ segir Kári í viðtali við Fréttablaðið í gær.

Kári segir að ef hluti smitaðra sem veikjast alvarlega komi til með að verða lítill muni þurfa að breyta nálgun okkar á tilraunir til að lifa með veirunni. Hann vill þá frekar vernda elliheimilin og þá sem eru með undirliggjandi sjúkdóma en að beita samskonar sóttvarnaraðgerðum og gert hefur verið hingað til. 

„Það er ó­mögu­legt að segja hversu lengi við þurfum að standa í þessu og við megum ekki beita þeim að­ferðum sem endanlega koma okkur öllum í gröfina. Við verðum að geta haldið á­fram að lifa í þessu landi,“ segir Kári.

Fjöldi smitaðra síðustu daga gæti verið toppurinn á ísjakanum

„Við höfum verið að skima í dag aðal­lega ein­kennaskimun sem þýðir að þeir sem eru einkennalausir eru mjög ó­lík­legir til að koma í skimun. Þannig að veiran gæti verið miklu út­breiddari í sam­fé­laginu en þessar tölur gefa til kynna. Það voru 88 smit í dag sem greinast á ein­kennum, það gæti verið toppurinn á ís­jakanum. Það gætu verið tíu sinnum fleiri sýktir úti í sam­fé­laginu, ein­kenna­lausir,“ segir Kári.

Kári segir stöðuna sem nú er uppi vera mjög spennandi og að við verðum að halda niðri í okkur andanum og endurmeta síðan nálgun okkar á faraldurinn. „Ef að spítalinn fyllist ekki og menn eru til­tölu­lega lítið lasnir þá er þetta eitt­hvað sem við verðum að læra búa við,“ bætir hann við.

Aðspurður af blaðamanni Fréttablaðsins segir Kári það ekki vera sitt að segja til um hversu hátt hlutfall smitaðra sem þurfi að leggjast inn á spítala væri ásættanlegt. 

„Það get ég ekki sagt. Við þurfum bara að kíkja á og meta það. Númer eitt er bara fjöldi þeirra sem leggjast inn á spítala. Númer tvö er við­brögð heil­brigðis­starfs­manna við þessum inn­lögnum og hvernig þeir ráða við þetta. Í þriðja lagi er það við­brögð sam­fé­lagsins. Hvernig bregst sam­fé­lagið við þessu?“

Markmið bólusetninga sé ekki einungis að koma í veg fyrir smit

„Þegar menn réðust í það að búa til bólu­efni gegn þessari veiru þá var ljóst að mark­miðið væri að gera annað af tvennu eða hvort tveggja. Sem er að búa til að bólu­efni sem kæmi í veg fyrir að menn smituðust, bólu­efni sem kæmi í veg fyrir að menn sýktust eða hvort tveggja,“ segir Kári.

„Ef að menn eru ó­sáttir með hversu lítil þessi bólu­efni komi í veg fyrir smit en kemur bara í veg fyrir að þeir sem smitast verði sjúkir. Þá væri ekki út í hött að búa til sér­stök slím­himnu­mót­efni eins og nef­sprey og svo framvegis,“ bætir hann við.

Allt tal um svikin loforð ríkisstjórnarinnar sé kjaftæði

„Stað­reyndin er sú, í sótt­vörnum að þessari gerð, er að þú breytir þinni stefnu frá degi til dags. Þú bregst við gögnum. Ríkis­stjórnin er að haga sér af fullri á­byrgð með því að bregðast við breyttum að­stæðum,“ segir Kári og bætir við að það sé bara kjaftæði að tala um að ríkisstjórnin hafi gengið á bak orða sinna með því að herða sóttvarnaraðgerðir á ný.

Kári vill að öllum þeim sem hafa fengið bóluefni Janssen verði gefinn annar skammtur um leið og sumarleyfi starfsmanna heilsugæslunnar er lokið. Þá vill hann að eldra fólk og þau sem glíma við undirliggjandi sjúkdóma fái þriðja skammt bóluefnis.