Kyn­líf­stækja­verslun skot­spónn Insta­gram­hakkarans

Jón Þór Ágústsson, einn eigenda Lovísu, segist ekki vita betur en að fyrirtækið sé það fyrsta sem kingsanchezx beini sjónum sínum að. Hótanirnar hafi farið að berast í dag og hófst samtal kingsanchezx við Instagram-aðgang Lovísu svo: „Gefið mér ástæðu til að loka ekki reikningi ykkar.“

„Hann segir síðan að ef ég blokka hann eða svari ekki þá ráðist hann á aðganginn,“ segir Jón Þór.

„Í þessum bissnes, eins og í öllu sem ég kem til með að taka mér fyrir hendur, er 100 prósent trúnaður á milli mín og viðskiptavina. Hann má alveg ráðast á þetta eins og hann vill en hann fær ekki það sem hann er að biðja um,“ segir Jón Þór.

„Hann má slátra þessum aðgangi“

Krafa kingsanchezx er sú að Lovísa láti af hendi upplýsingar um viðskiptavini sína: „Ég þarf svolitið frá ykkur,“ sendir kingsanchezx á Lovísu.

„Ókei og hvað væri það?“ spyr verslunin á móti.

„Einhver pantaði eitthvað frá ykkur, ef þið sendið mér samtalið ykkar á milli, mun ég láta ykkur og aðganginn ykkar í friði,“ skrifar kingsanchezx þá.

Jón Þór segir ekki koma til greina að hann láti upplýsingar um kaup viðskiptavina sinna af hendi.

„Með svona verslun er þetta aðeins viðkvæmara en ef þú ert að kaupa þér varahluti í bílinn þinn og trúnaður við viðskiptavini er eitthvað sem ég tek mjög alvarlega. Og ég held að hann geri sér alveg grein fyrir því, þannig að hann ræðst á veika hlekki,“ segir Jón Þór. „Ég veit svo ekki hvað hann hefði gert við þær upplýsingar hefði hann náð að hræða mann í það.“

Hann segir að sama hvað hakkarinn biðji um muni hann ekki mæta neinum hótunum. Ef svo fari lokist reikningurinn bara.

„Mér er alls ekki sama en ef ég ber það saman við það að viðhalda trúnaði við mína viðskiptavini þá má hann bara slátra þessum aðgangi,“ segir Jón Þór.

Mánaðargamall Instagram-aðgangur

Hann segir þó leiðinlegt að verða skotspónn hakkarans, þar sem þeir séu nýbyrjaðir í bransanum og ekki búnir að hasla sér almennilega völl.

„Þetta er bara eins mánaða gamall aðgangur og það er verið að fara að fella hann. En hann verður þá bara að gera það og við bara að reisa aðganginn upp aftur,“ segir Jón Þór.

Hann segir næstu skref vera að tilkynna málið til Facebook, eiganda Instagram, og segist tilbúinn að leggja hönd á plóg með hópi áhrifavaldanna sem orðið hafa fyrir árásum.

„Þeir hljóta að vera vakandi yfir þessum aðila. Hann er búinn að ráðast á aðganga stærstu samfélagsmiðlastjarna landsins,“ segir Jón Þór. „Við erum alveg til í að leggja okkar af mörkum við að reyna að tjónka við hann.“

Jón Jónsson næstur?

Svo virðist sem söngvarinn Jón Jónsson sé næstur á dagskrá hjá hakkaranum. Kingsanchezx setti mynd af Instagram-reikningi Jóns í hringrás sína fyrir um klukkutíma síðan, merkir Jón á myndina og skrifar Hæ! 

Hakkarinn hefur beitt Instagram-aðgangi sínum til að ljóstra upp um hvaða aðgöngum hafi verið lokað og hverjri séu næstir á dagskrá. Í hringrás hans má enn sjá myndband af því þegar hann lokaði Instagram-reikningi Birgittu Lífar Björnsdóttur, eiganda Bankastræti Club og World Class erfingja, sem hann gerði síðdegis í gær.