Ramsay ekki viss um að ís­lenskur há­karl sé ætur

Ramsay gerir tilraun til að borða hákarlinn en á í einhverjum erfiðleikum við það eins og sjá má í klippunni. Eftir að hafa manað sig upp í að borða hann skellir hann hákarlsbitanum upp í sig og hendir aftur brennivínsskoti áður en hann spýtir hvoru tveggja út úr sér.

„Ég er hérna á norðvestur Íslandi að prófa bitran bita af hákarli. Ég er ekki viss um að það eigi að borða þetta,“ segir Ramsay í klippunni.

Tökur á þættinum fóru fram á Vestfjörðum í fyrrasumar. Finnbogi sagði í viðtali við fréttastofu síðasta sumar að hann hafi kallað Ramsay aumingja. Hákarlinn sem Ramsay hafi fengið að smakka hafi verið fyrir fimm ára og að hann hafi ekki viljað gefa Ramsay sterkari hákarl.

„Fylgdarmenn hans sögðu síðan við mig, helvíti var þetta gott hjá þér, þetta þurfti hann að heyra og svona lætur hann við alla. Ég var nú bara að stríða honum, kallgreyinu. Hann kom ákaflega vel fyrir og ekkert nema gott um að hann að segja,“ sagði Finnbogi í samtali við fréttastofu í fyrrasumar.

Í klippunni sem birtist á vef People spyr Ramsay Finnboga að því hvort hákarlinn sé nokkuð hollur.

„Alveg tvímælalaust. Öll liðamót verða góð og svo er betra að kúka líka,“ svarar Finnbogi kokkinum fræga sem fussar og segist ekki ætla að nota hákarlinn við eldamennsku.

„Nei, enda þarf ekkert að elda hann,“ segir Finnbogi.