Di María nýtti tækifærið og steig út úr skugga Messi

Di Maria hefur áður skorað mikilvæg mörk en fá jafn mikilvæg og þessi. Loksins loksins tókst Argentínu – og Lionel Messi – að vinna stórmót. 

Argentína tapaði 1-0 fyrir Þýskalandi í úrslitaleik HM árið 2014. Tvö ár þar á eftir fór liðið alla leið í úrslit Suður-Ameríkubikarsins en laut í bæði skiptin í gras fyrir Síle.

Allt er hins vegar þegar þrennt er. Di María byrjaði báða leikina gegn Síle og nú var komið að skuldadögum. Loksins kom bikar í hús. Lionel Scaloni, þjálfari Argentínum, fær mikið hrós fyrir taktík og skipulag en gekk leikplan hans nær fullkomlega upp.

Di María var stillt upp á  hægri vængnum í 4-4-1-1 leikkerfi Argentínu. Átti hann að nýta sér svæðið sem Renan Lodi, vinstri bakvörður Brasilíu, skyldi eftir sig þegar hann brunaði upp völlinn. 

Í stað þess að elta Lodi þá beið Di María ofarlega á vellinum, tilbúinn að geysast af stað er Argentína ynni boltann. Hafði hann ógnað vörn Brasilíu oftar en einu sinni og oftar en tvisvar áður en sigurmarkið leit dagsins ljós. 

Í raun skipti það leikmenn Argentínu litlu máli hvort Lodi héldi stöðu eður ei, ávallt reyndu þeir að fara upp hægra megin.

Á 22. mínútu kom markið sem reyndist sigurmark leiksins. Miðjumaðurinn Rodrigo De Paul fékk þá að rölta upp völlinn með boltann -  einn og yfirgefinn. De Paul var líkt og Palli er hann var ein ní heiminum en enginn Brasilíumaður var í augsýn. Miðjumaðurinn sendi svo fínan bolta milli Lodi og Thiago Silva í vörn Brasilíu.

Lodi virtist við það að ná til boltans en allt kom fyrir ekki, hann endaði við fæturnar á Di María.  Vængmaðurinn tók vel við knettinum í fyrstu snertingu og lyfti honum svo yfir Ederson í marki Brasilíu í annarri snertingu.

Setja má út á staðsetningu Ederson en markið var einkar snoturt.

Brasilía lagfærði varnarleik sinn í kjölfarið og gerðu hvað þeir gátu til að jafna metin í síðari hálfleik. Di María var tekinn af velli þegar rúmar tíu mínútur lifðu leiks er Argentína reyndi að hanga á 1-0 forystunni. Það gekk og leikmenn Argentínu fögnuðu vel og innilega í leikslok.

Messi stal vissulega flestum fyrirsögnunum eftir leik en það þó með sanni segja að Di María hafi loks stigið út úr skugga landa síns. Hinn 33 ára gamli vængmaður kann þó ágætlega við sig í skugga stærri nafna. Hjá Real Madrid var hann liðsfélagi Cristiano Ronaldo og nú leikur hann með liði sem inniheldur Brasilíumanninn Neymar og ungstirnið Kylian Mbappé. 

Þegar kom að því að smíða leikplan til að landa sigri í Suður-Ameríkubikarnum ákvað Lionel Scaloni að treysta á hinn þaulreynda Di María og sterka liðsheild frekar en einstaklings gæði nafna síns Messi.

Það borgaði sig svo sannarlega í þetta skiptið.