Ekki færri mörk í fyrstu umferð í 21 ár

Það voru aðeins skoruð sjö mörk í fyrstu umferð Pepsi Max deildar karla í fótbolta um helgina sem er nýtt met í tólf liða deild og það minnsta í fyrstu umferð í meira en tvo áratugi.

Það þarf að fara alla leið aftur til sumarsins 2000 til að finna jafnfá mörk í fyrstu umferð efstu deildar karla í knattspyrnu.

Það komust aðeins fjögur af tólf liðum deildarinnar á blað þar af skoruðu FH, KR og Valur 86 prósent markanna eða tvö mörk hvert lið.

Það voru meðal annars tvö markalaus jafntefli í umferðinni en það höfðu bara verið tvö markalaus jafntefli samtals í fyrstu umferð á fyrstu þrettán tímabilunum í tólf liða deild.

Síðan fjölgað var í tólf lið árið 2008 hafa verið sex leikir í fyrstu umferðinni. Fæst mörk í fyrstu umferðinni síðan þá voru fjórtán mörk 2009 og 2012. Það er tvöfalt fleiri mörk en í þessari fyrstu umferð í ár.

Metið í nútímafótbolta (frá 1977) eru sex mörk sem voru skoruðu í fimm leikjum í fyrstu umferðunum árin 1984 og 1989.