Fótboltastrákurinn fyrst í sóttkví „en svo fór boltinn að rúlla“

Í gær kom í ljós að ellefu nemendur 6. bekkjar við skólann hefðu smitast af veirunni. Nemendurnir eru því alls tólf sem hafa greinst með veiruna auk eins kennara við skólann.

Forsaga málsins er sú að smit kom upp hjá 5. flokki drengja sem æfa knattspyrnu hjá Þrótti. Í gærkvöldi var ákveðið að allur 5. flokkur færi í sóttkví. Hinn tíu ára fótboltastrákur Ari Bergur Garðarsson er á meðal þeirra sem var sendur í sóttkví vegna málsins. Eyrún segir að hún hafi fengið þetta staðfest í gærkvöldi.

„En svo fór boltinn að rúlla. Við í hverfinu erum vel tengd og vel tengd inn í skólasamfélagið og erum öll í góðu sambandi og samstarfi hér – og sjálfsagt er það þannig í öllum skólahverfum – en eftir að við töluðum saman þá fór maður að skilja hvað væri í gangi. […] Það virðast bara vera ótal mörg smit innan veggja skólans.“

Allir nemendur Laugarnesskóla og Laugalækjaskóla voru sendir í úrvinnslusóttkví í gær en það hafði í för með sér að hinn sonur Eyrúnar, hinn átta ára Björn Steinar Garðarsson, þurfti einnig að fara í sóttkví. Í morgun fékk Eyrún skilaboð frá leikskóla dóttur sinnar, Lilju Garðarsdóttur, um að vinsamlegast halda börnum sínum heima ef önnur börn á heimilinu væru annað hvort í sóttkví eða úrvinnslusóttkví svo úr varð að öll börnin þrjú eru heima í dag. Eyrún segir ljóst að verið sé að huga að öryggi barnanna og er þakklát fyrir að leikskólinn hafi tekið þessa stefnu í málinu.

„Sem er frábært, eðlilegt og gott að þessi ákvörðun sé bara tekin fyrir mann.“

Hún kveðst einnig afar þakklát skólayfirvöldum fyrir að hafa tekið fast og vel á málum og vonar að skólinn verði lokaður fram yfir páska. Þá segir hún viðbrögð þjálfara hjá Þrótti hafa verið fumlaus og upplýsingaflæðið gott. „Þetta er gríðarleg vinna. Þeir hafa staðið sig mjög vel og haldið okkur vel upplýstum og þjálfarinn búinn að hringja og það er engin smá vinna að hringja kannski í foreldra alls sjötíu og fimm stráka.“

Það hafi mikla þýðingu að vera vel upplýst um gang mála því það sé talsvert ógnvekjandi að hópsýking hafi komið upp í skóla barna hennar.

„Mér finnst þetta bara mjög ógnvekjandi og þetta setur vissulega að mér ugg. […] Um leið og maður heyrði að það væri eitt barn sem hefði hugsanlega smitast innan veggja skólans, þá eiginlega getur maður verið fullviss um að þau eru fleiri og það hefur komið á daginn.“

Ari Bergur hefur sér aðstöðu á neðri hæðinni þar sem hann getur verið í sóttkví en Eyrún segir að honum leiðist alls ekki neitt.

„Hann er bara mjög hress og nokkuð sáttur. Hann er bara í tölvuherberginu og finnst það ekkert leiðinlegt og fer út í garð og æfir sig í fótbolta og sá sem er í þriðja bekk er líka mjög hress. Leikskólabarnið er farið að hósta sem er í sjálfu sér, í venjulegu árferði, ekkert óeðlilegt.“ Að öðru leyti séu allir nokkuð hraustir.

Eyrún er búin að panta sýnatöku fyrir barnahópinn í heild sinni. Það sé afar mikilvægt að allir leggi sitt af mörkum til að koma í veg fyrir útbreiðslu veirunnar.

„Við verðum að gera þetta saman, við verðum að taka höndum saman, það er bara ekkert öðruvísi en það.“

„Ég viðurkenni það alveg að maður var farinn að hlakka til að fara út að borða og gera eitthvað skemmtilegt en þetta var aldrei búið og það var líka alveg búið að gefa það út. Þetta er ekki búið, við verðum að fara varlega.“