Bæta við ákæru á hendur lögreglumanninum vegna dauða Floyd

Ákvörðun dómarans kom í kjölfar niðurstöður áfrýjunardómstóls en hann hafði áður fellt niður liðinn um manndráp án ásetnings þar sem hann taldi hann ekki eiga við í málinu. Réttarhöldin, sem hófust með vali á kviðdómendum í vikunni, geta nú haldið áfram en hætta var á að þau frestuðust um fleiri vikur eða mánuði vegna ágreinings um ákæruefnið, að sögn AP-fréttastofunnar.

Fyrir átti Chauvin yfir höfði sér ákæru fyrir manndráp af gáleysi og manndráp. Lögspekingar telja það styrkja stöðu saksóknara að bæta við ákærunni um manndráp án ásetnings þar sem kviðdómendur hafa nú fleiri möguleika á að sakfella lögreglumanninn fyrrverandi.

Chauvin, sem er hvítur, er sakaður um að hafa valdið dauða Floyd, óvopnaðs blökkumanns, þegar hann og þrír aðrir lögregluþjónar höfðu afskipti af honum í maí í fyrra. Hélt Chauvin hné sínu á hálsi Floyd í um níu mínútur þrátt fyrir að Floyd reyndi að segja honum að hann næði ekki andanum, andmæli vegfarenda og jafnvel eftir að hinir lögreglumennirnir bentu Chauvin á að þeir fyndu ekki lengur púls Floyd.

Dauði Floyd varð kveikjan að mikilli mótmælaöldu gegn lögregluofbeldi og kerfislægri kynþáttahyggju í Bandaríkjunum og víðar um heim.