Vann með ólöglegum innflytjendum fyrir rússneskan gyðing

Hann lagði stund á ljóð- og kvæðalist frá unga aldri, lærði allar kúnstarinnar reglur bragfræðinnar og hefur tekið þær með sér gegnum lífið og gefið út ljóða- og kennslubækur um fagið.

Ragnar hefur lært mikið á leið gegnum lífið, bæði í skóla og sótti doktorsgráðu í stuðlasetningu fyrir tíu árum síðan, en einnig af reynslunni, því hann barðist við vanlíðan sem ungur maður og vökvaði það ástand síðan með neyslu áfengis í 15 ár.

35 ára gamall sneri hann hins vegar við blaðinu og hefur haldið afskaplega heilbrigðan lífsstíl síðan. Ragnar er 77 ára gamall. Hann hefur ekki borðað sykur í áratugi og hefur ekki borðað kjöt síðan 1985 og er hættur að reykja. Hann hefur verið 12 spora maður í meira en 40 ár og á ekki sjónvarp.

Snæbjörn Ragnarsson ræddi við Ragnar í hlaðvarpinu Snæbjörn talar við fólk og hafði hann frá mörgu að segja.

Þegar eiginkona Ragnars fór í nám til Bandaríkjanna í Chicago vann hann á mjög vafasömum veitingastað þar í borg.

„Ég vann sem sendill fyrir kínverskan veitingastað og keyrði mat um borgina,“ segir Ragnar og heldur áfram.

„Ég var í þessu í þrjú ár og þetta var ægilegt fjör. En þetta var skrautlegt líf og var svona veitingastaður sem var undir einni járnbrautarstöðinni og var kannski fjórða flokks og ekki mjög kræsilegt allt.“

Hann segir að þarna hafi hann unnið í svokölluðu neðanjarðar hagkerfi í Bandaríkjunum.

„Þarna unnu með mér ólöglegir innflytjendur sem höfðu enginn réttindi og hægt að segja þeim að éta það sem úti frýs. Ég kynntist þarna allskonar fólki. Ólöglegir innflytjendur frá Mexíkó og frá austurlöndum líka. Svo fékk maður greitt í seðlum frá eiganda staðarins. Eigandinn var rússneskur gyðingur alinn upp í Bandaríkjunum. Raddsterkur og ægilega skapmikill,“ segir Ragnar sem fékk í raun vinnuna á sínum tíma af þeirri ástæðu að hann var maraþonhlaupari.