Tölfræðin í Eystri Rangá eftir sumarið

Eystri Rangá var aflahæsta veiðiá landsins á síðasta sumri og sló sitt eigið met og gott betur en það.

Heildarveiðin í ánni var 9070 laxar og það þarf þess vegna ekkert að koma á óvart að veiðileyfin í ánna hafa selst óhugnalega hratt fyrir sumarið 2021. Staðan er þannig að júlí er uppseldur og lítið eftir af leyfum í ágúst og júní. Eitthvað er laust í september. Nú hefur verið tekin saman tölfræði fyrir júní og júlí mánuð og það er áhugavert að sjá hvaða svæði gáfu best og eins að sjá magnið af laxi sem veiddist á sumum svæðum. 

Sem dæmi um þessa ótrúlegu veiði þá gaf svæði 1 937 laxa í júlí og svæði 3 gaf 782 laxa. Samtals veiddust 3.453 laxar í ánni bara í júlí! Ágúst var síðan ennþá magnaðri en dæmi voru um að suma daga veiddust hátt í 100 laxar BARA á svæði 1 á dag, já á DAG! Aðeins 13% veiddra laxa voru stórlaxar og það er yfirleitt þannig að eftir gott smálaxaár í ánni kemur gott stórlaxaár svo það má reikna með að það verði mikið af vænum löxum sem koma á flugur veiðimanna næsta sumar í Eystri Rangá og það fer víst hver að verða síðastur að tryggja sér daga í ánni.

Þú getur skoðað tölfræðina nánar á vef Kolskeggs eða HÉR.