Víða þurrt og frost á landinu

Þetta kemur fram í hugleiðingum veðurfræðings á vef Veðurstofunnar. Þar segir að vestast á landinu verði hins vegar suðaustan kaldi eða strekkingur með slyddu af og til. Hiti þar verður rétt yfir frostmarki, en í nótt kólni lítið eitt og úrkoman falli þá líklega sem snjókoma.

„Sunnan gola og dálítil snjókoma eða slydda með köflum á morgun, en heldur samfelldari úrkoma á Suðurlandi. Hiti í kringum frostmark. Þurrt um landið austanvert og frost 1 til 8 stig.“

Veðurhorfur á landinu næstu daga

Á þriðjudag: Suðlæg átt 3-10 m/s og dálitlar skúrir eða él, en víða rigning eða snjókoma á Suðurlandi. Hiti kringum frostmark. Þurrt um landið austanvert og frost 1 til 6 stig.

Á miðvikudag: Austlæg átt 8-15 m/s, en hægari um landið norðanvert. Slydda eða snjókoma með köflum og hiti kringum frostmark, en rigning við suður- og austurströndina seinnipartinn með hita 1 til 6 stig.

Á fimmtudag: Suðaustan og austan 8-15 og rigning með köflum, en slydda norðvestantil framan af degi. Þurrt norðaustan- og austanlands. Hiti 1 til 7 stig, mildast syðst.

Á föstudag, laugardag og sunnudag: Austlæg átt og væta af og til á Suðausturlandi og Austfjörðum, en úrkomulítið í öðrum landshlutum. Hiti 2 til 7 stig.