Gylfi Þór býst við hörkuleik

„Það er bara annað hvort eða, þetta er úrslitastund. Ég er skíthræddur við þetta og þori varla að vera með neinar væntingar. Auðvitað vona ég að við merjum þetta, 1- 0 - kannski 2-0, það vona það allir Íslendingar,“ segir blikinn Gylfi Þór Sigurpálsson, inntur eftir tölum kvöldsins. Hann reiknar með að nafni hans standi sína plikt á vellinum.

„Hann er minn maður og hefur verið frá því hann kom inn í 4. flokk sem gutti. Ég hef fylgst með honum síðan.“

Engin bulla

Gylfi er Bliki í húð og hár og styður sína menn dyggilega en segist enginn æsingamaður þegar kemur að fótbolta. „Ég er löngu vaxinn upp úr allri sérvisku kringum boltann, að fara alltaf í sömu nærbuxunumn á völlinn og slíkt og ég er engin fótboltabulla. Þó ég öskri þegar við skorum mark þá fer ég ekkert á taugum yfir leik. Ég mun líklega horfa einn í kvöld, konan hefur engan áhuga á þessu,“ segir hann.

Ódýrari útgáfan

Gylfi prýðir auglýsingaherferð Orkunnar „Ódýrari útgáfan“ þar sem nokkrir nafnar íslensku landsliðsmannanna stilla sér upp með bolta. Gylfi sló strax til þegar hann var beðinn um að „hlaupa í skarðið“ fyrir nafna sinn í herferðinni en segir þeim annars ekki ruglað saman.

„Það hefur aldrei komið upp neinn misskilningur með mig og Gylfa. Það er helst að fótboltaáhugamenn geri skemmtilegar athugasemdir þegar þeir lesa á nafnspjaldið mitt í vinnunni. Mér fannst þetta bara sniðugt þegar þeir hringdu í mig frá Brandenburg. Þeir mætti hingað í vinnuna til mín, í Byko og smelltu af mér mynd hérna á lagernum. Þetta var ekki neitt mál,“ segir Gylfi.