Stjórnendur Icelandair geti verið í golfi til 2022

Mikil áhætta felst í því að fjárfesta í Icelandair þessi misserin og gera má ráð fyrir að lítið verði að gera í flugrekstri til loka árs 2021, að sögn Snorra Jakobssonar, greinanda og eiganda Jakobsson Capital. Verðmatsgengi Icelandair Group er nú 2,7 og félagið rúmlega 78 milljarða króna virði. Þetta kemur fram í verðmati fyrirtækisins.

Í verðmatinu er farið yfir helstu rekstrarþætti en þar segir að samanburðurinn sé lítill enda rekstur félagsins „eins og svart og hvítt fyrir og eftir Covid“. Rekstrarhagnaður, EBIT, nam tæpum 3,5 milljónum á þriðja ársfjórðungi en í rekstraráætlun félagsins var gert ráð fyrir að rekstrarhagnaður yrði 10 milljónir dollara.

„Miklar sveiflur eru í flugrekstri og hefur reksturinn sjaldnast staðist rekstraráætlanir eða „guidance“ fyrir árið í heild og hvað þá fyrir einstaka ársfjórðunga. Þótt þær hafi oft ekki verið fjarri endanlegri niðurstöðu. Snorri veltir lítið fyrir sér fráviki frá rekstraráætlun. Þótt sumir hafi undarlegt skopskyn og halda að reksturinn á tímum Covid sé niðurnelgdur í handrit,“ segir í verðmatinu.

Hlutafjárútboði Icelandair lauk þann 18. september síðastliðinn. Var umframeftirspurn eftir hlutum í félaginu. Stjórn Icelandair group samþykkti áskriftir að fjárhæð 30,3 milljarða króna. Þá er markaðsgengi Icelandair Group í sama mati talið 0,9 og markaðsvirði rúmir 23 milljarðar króna. Síðan þá hefur Icelandair selt þrjár Boeing 757-200 þotur fyrir 2,9 milljarða króna til bandarísks fjárfestingarsjóðs. Fyrirtækið sagði upp 88 starfsmönnum í lok september.

Bent er á í verðmatinu að bætur Boeing sem hafi að mestu farið í gegnum rekstrarreikning og haft jákvæð áhrif á rekstrarafkomu fari nú að stærri hluta í gegnum sjóðsstreymi sem lægri fjárfesting. Enn fremur segir að tekjur hafi verið 103,6 milljónir dollara á þriðja ársfjórðungi, eða 14,5 milljarðar króna, og tekjur Icelandair 373,4 milljónir dollara á fyrstu níu mánuðum ársins, sem samsvarar 52,4 milljörðum íslenskra króna.

Reikningshaldslegt runk og golf næstu árin

„Í útboðskynningu var gert ráð fyrir að tekjur næmu 475 milljónum dollara árið 2020 og ljóst að Icelandair mun ekki ná því þrátt fyrir að rekstraráætlun sé rúmlega sex vikna gömul,“ segir í verðmatinu og greinandinn talar tæpitungulaust, afar lítið verði að gera í flugrekstri til loka ársins 2021.

„Endurskoðuð rekstraráætlun Jakobsson Capital gerir ráð fyrir að stjórnendur Icelandair geti verið í golfi til ársins 2022.“

Þá er tekið fram að hagnaður á rekstri Icelandair á þriðja ársfjórðungi hafi verið 38,2 milljónir króna. ­

„Hér vóg þungt endurskilgreining á afleiðusamningum. Hér er að hluta um að ræða „reikningshaldslegt runk“. Eldsneytisvarnir hafa verið endurskilgreindar. Mikið tap var á eldsneytisvörnum á fyrri hluta ársins. Þegar tekjur hrundu flokkuðust áhættuvarnir sem „spákaupmennska“ og fóru í gegnum rekstrarreikning. Dregið hefur verið úr eldsneytisvörnum til samræmis við minna umfang og stefnt að því að þær fari ekki í gegnum rekstrarreikning þótt allar rekstraráætlanir séu erfiðar nú.“

Mikil áhætta í kaupum á Icelandair 

Niðurstöður verðmatsins eru að virði Icelandair sé 557 milljónir dollara en síðasta verðmat hljóðaði upp á 378 milljónir dollara og hækkar um 47 prósent. Það sé mikið í prósentum talið en ekki krónum. Að lokum er fólki bent á að mikil áhætta felist í kaupum á Icelandair.