„Stór dagur fyrir mig og fjöl­skyldu mína“

Rúnar Alex Rúnarsson, sem skrifaði undir fjögurra ára samning við Arsenal í dag, segir að þetta sé stór dagur fyrir sig og fjölskyldu sína.

Tilkynnt var um skipti Rúnars í dag en þau höfðu legið í loftinu í einhvern tíma. Hann segir að hann sé að ganga í raðir risa félags.

„Ég er mjög ánægður og stoltur. Þetta er stór dagur fyrir mig og fjölskyldu mína. Ég get ekki beðið eftir því að byrja,“ sagði Rúnar Alex við heimasíðu Arsenal.

„Þetta er eitt stærsta félag í heimi. Þeir hafa unnið ensku úrvalsdeildina þrettán sinnum og enska bikarinn fjórtán sinnum. Þetta er risa félag og auðvitað eru þeir að spila í ensku úrvalsdeildinni, svo þetta er sigurstaða fyrir mig.“

„Ég veit að þetta verður erfitt en ég er tilbúinn að gera allt til þess að fá eins margar mínútur og möguleiki er á.“

Hjá Arsenal hittir Rúnar Alex fyrir markmannsþjálfarann Inaki Cana en þeir unnu saman hjá Nordsjælland ií Danmörku.

„Samband okkar, frá því að við kynntumst fyrir fjórum árum síðan, hefur verið gott. Við höfum haldið góðu sambandi; á meðan ég var í Frakklandi og hann í Englandi.“

„Sú staðreynd að hann er hér er mikilvægt og það er mikilvægt fyrir mig að þekkja einhvern hérna. Hann veit hvað ég get, hvað ég þarf að bæta og hvað ég get komið með til félagsins. Ég held að þetta sé gott, í annað skipti á ferlinum!“ sagði Rúnar um Inaki.