Búinn að taka fimmtán fleiri skot en næsti maður á lista

Óttar Magnús Karlsson hefur verið óhræddur við að skjóta á markið í fyrstu tíu leikjum Víkinga í Pepsi Max deild karla í sumar.

Óttar Magnús hefur reynt 47 skot í leikjum tíu og er með 4,39 skot á hverjar 90 mínútur spilaðar.

Óttar Magnús er í raun með yfirburðastöðu á lista tölfræðiþjónustunnar Wyscout yfir þá sem hafa tekið flest skot í deildinni til þessa.

Hann er með fimmtán skot í forskot á næsta mann sem er FH-ingurinn Steven Lennon með 32 skot. KR-ingurinn Óskar Örn Hauksson er síðan þriðji með 30 skot og liðsfélagi hans Atli Sigurjónsson er fjórði með 29 skot.

Óttar Magnús Karlsson er markahæsti leikmaður Pepsi Max deildar karla ásamt Blikanum Thomas Mikkelsen en báðir hafa þeir skorað 9 mörk. Thomas Mikkelsen er á undan á listanum þar sem hann hefur spilað einum leik færra.

Thomas Mikkelsen hefur líka fengið betri færi en Óttar því markalíkur Danans í sumar eru 8,89 á móti 5,76 hjá Óttari. Hér erum við að tala um tölfræði yfir markalíkur (XG - Expected goals) frá Wyscout.

Það hafa verið 0,12 líkur á marki í hverju skoti Óttars Magnúsar sem er lægra en hjá Steven Lennon (0,17) en hærra en hjá bæði Óskari Erni (0,08) og Atla (0,07).

Það hafa aftur á móti 0,34 líkur á marki í hverju af 26 skotum Thomas Mikkelsen í leikjum Blika í sumar sem er næstum því þrefalt meira en hjá Óttari.

Leikur Fjölnismanna og Víkinga í 13. umferð Pepsi Max deildar karla hefst klukkan 18.00 í kvöld á Extra vellinum í Grafarvogi. Engir áhorfendur eru leyfðir á leiknum en hann varður sýndur í beinni útsendingu á Stöð 2 Sport 3 og hefst útsendingin klukkan 17.50.

Þrettánda umferðin heldur svo áfram á föstudaginn og laugardaginn en allir leikirnir verða í beinni útsendingu á sportstöðvum Stöðvar tvö.