Segir endur­komu Þor­steins Más velta á niður­stöðu rann­sóknar Wik­borg Rein

Björgólfur Jóhannsson, starfandi forstjóri Samherja, segist ekki eiga von á því að gegna embættinu fram yfir lok fyrri hluta þessa árs. Hann útilokar ekki að Þorsteinn Már Baldvinsson muni snúa aftur í embætti forstjóra, en að það velti á niðurstöðu rannsóknar norska ráðgjafafyrirtækisins Wikborg Rein á meintum mútugreiðslum starfsmanna Samherja í Namibíu.

Björgólfur segir þetta í samtali við IntraFish. Hann segist eiga von á að niðurstaða rannsóknar Wikborg Rein muni liggja fyrir í apríl.

Björgólfur var fenginn til að taka við stöðu forstjóra fyrirtækisins eftir að greint var frá því þann 14. nóvember síðastliðinn að Þorsteinn Már myndi stíga tímabundið til hliðar.

Útilokar ekki að Þorsteinn Már snúi aftur

Björgólfur útilokar í viðtalinu ekki að Þorsteinn Már muni aftur setjast í stól forstjóra. „Hann hefur verið starfandi í íslenskum sjávarútvegi um margra ára skeið og er líklega sá maður sem þekkir best til fiskveiða á Íslandi og í Evrópu,“ segir Björgólfur.

Hann segir rannsókn Wikborg Rein ekki vera „reykjarhulu“ (e. smokescreen) sem muni fría fyrirtækið af allri ábyrgð. „Fyrirtækið vill sjálft vita hvað það var sem gerðist,“ segir Björgólfur.

Yfirvöld á Íslandi, Namibíu og Noregi eru einnig með starfsemi Samherja til skoðunar.

Útilokar peningaþvætti

Í viðtalinu er haft eftir Björgólfi að fyrirtækið sé með ásakanir um mútugreiðslur til skoðunar en að fyrirtækið útiloki að það hafi stundað peningaþvætti.

Þá segir hann að málið hafi ekki haft nein áþreifanleg áhrif á viðskipti fyrirtækisins. „Við höfum ekki misst neina viðskiptavini enn sem komið er, en þeir hafa áhyggjur af þessu og við vinnum náið með þeim.“

Hafa bent á Jóhannes

Eftir Kveiksþáttinn, þar sem greint var frá starfsháttum Samherja í Namibíu, kom fram í tilkynningum frá Samherja að sökin í málinu lægi hjá Jóhannesi Stefánssyni, fyrrverandi framkvæmdastjóra og stjórnarmanni Samherjafélaganna í Namibíu. 

Hafi hann virðist hafa „flækt Samherja í viðskipti sem kunna að vera ólögmæt.“ Jóhannes, sem lak gögnum um starfsemi Samherja til Wikileaks og fyrrgreindra fjölmiðla, sagði aftur á móti að Þorsteinn Már og aðrir stjórnendur félagsins hafi verið miðlægir í „gagnrýnisverðum viðskiptaháttum“ Samherja í Namibíu.