Fyrsta útkallið í óveðrinu kom í nótt

Óveður gengur nú yfir landið allt og eru appelsínugular og gular veðurviðvaranir í gildi á landinu. Stofnleiðum úr Reykjavík hefur verið lokað og röskun hefur orðið á flugi frá Keflavíkurflugvelli.

Þá hafa björgunarsveitir í nægu að snúast en fyrsta útkallið vegna óveðursins barst björgunarsveitum rétt fyrir klukkan þrjú í nótt.

Höfðu þá tveir ferðamenn fest bíl sinn á Nesjavallavegi, Dráttarbíll sem kallaður hafði verið til komst ekki til þeirra og var því kallað eftir björgunarsveitum. Var fólkið sótt og því komið til byggða. Bíllinn var hins vegar skilinn eftir.