Lægð upp að landinu í kvöld

Í dag er spáð fremur hægum vindi og vætu í flestum landshlutum. Líkur eru á súld og þokumóðu fram eftir degi, þá einkum norðvestanlands. Hiti verður á bilinu 8 til 15 stig og reikna má með að hlýjast verði á Norðausturlandi. Þetta kemur fram í hugleiðingum veðurfræðings á vef Veðurstofunnar.

Í kvöld kemur lægð upp að landinu úr suðri og fer að hvessa suðaustanlands, en þar tekur gildi gul veðurviðvörun frá og með miðnætti, aðfaranótt morgundagsins, og gildir hún til klukkan tíu á miðvikudagsmorgun. Útlit fyrir áframhaldandi austanátt með vætu víðast hvar, einkum um austanvert landið, sem snýst í sunnanátt um kvöldið á sama tíma og dregur úr úrkomu.

Seinna í vikunni er meinlaust veður í kortunum. Þá verður fremur hægur vindur og rigning með köflum, en stefnir í hlýnandi og bjart veður um norðaustanvert landið næstu helgi.

Veðurhorfur næstu daga, samkvæmt veðurstofu Íslands:

Á miðvikudag:

Austlæg átt 5-13 m/s með rigningu víðast hvar, en 13-18 m/s suðaustanlands um morguninn, og talsverð úrkoma fram eftir degi þar. Snýst í hægari suðlæga átt seinnipartinn, en hvessir af norðaustri á Vestfjörðum. Hiti 8 til 13 stig.

Á fimmtudag:

Suðlæg átt 3-10 m/s. Rigning og hiti 8 til 12 stig, en þurrt og bjart norðaustanlands með hita á bilinu 10 til 16 stig.

Á föstudag:

Fremur hæg norðlæg eða breytileg átt, en heldur hvassari suðaustanátt við suðausturströndina. Rigning austantil, annars bjart með köflum og þurrt að mestu. Hiti 8 til 14 stig að deginum.

Á laugardag:

Sunnan og suðvestan 5-13 m/s. Rigning um vestanvert landið, annars skýjað með köflum og þurrt. Fremur milt í veðri, einkum á Austurlandi.

Á sunnudag og mánudag:

Útlit fyrir sunnanátt með rigningu sunnan- og vestantil, annars þurrt og bjart með köflum. Hlýnandi veður á Norðausturlandi, annars lítil breyting í hita.