Sjóbleikjan ekki mætt fyrir norðan

Frá miðjum júlí byrjar sjóbleikjan að ganga í árnar á norðurlandi og það eru margir sem sækja í þessa veiði því betri matfisk færðu varla.

Það bregður því mörgum veiðimanninum í brún þessa dagana þegar árnar í Eyjafirði og víðar eru frekar tómar. Það eru sárafáar bleikjur gengnar í árnar og vanir veiðimenn sem hafa veitt til dæmis Hörgá í áratugi á þessum tíma eru að fá eina og eina í stað þess að setja í 20-30 bleikjur yfir daginn. Þetta er sagan í flestum ánum í Eyjafirði og ljóst að annað hvort er sjóbleikjan hreinlega ekki mætt í árnar eða að eitthvað hafi farið úrskeiðis í hrygningunni síðasta haust. Það er heldur ekki óþekkt að hún mæti seint þegar það hefur verið snjóþungur vetur, kalt vor og ofan í það mikil snjóbráð fram eftir sumri. 

Sjóbleikja vill helst ekki ganga upp í árnar ef þær eru of kaldar og bíður annað hvort eftir því að þær hlýni eða að þangað til hún er í spreng til að hrygna. Veiðimenn sem sækja í sjóbleikju á norðurlandi bíða því átekta eftir fréttum af fyrstu alvöru göngunum í árnar.