30 laxa dagar í Ytri Rangá

Veiðin í Ytri Rangá hefur kannski ekki alveg verið í takt við systuránna en engu að síður er veiðin ágæt þó hún hafi oft verið meiri.

Það er lax að ganga á hverju flóði og það sést ágætlega þegar það bætist við í Djúpós og nýjir laxar fara að stökkva á breiðunni. Veiðivísir heyrði í Bjarka Má Jóhannssyni yfirleiðsögumanni við Ytri Rangá og segir hann stöðuna vera alveg viðundandi en það séu þessa dagana um 30 laxar að veiðast á dag. Heildarveiðin var komin í 575 laxa í síðustu viku en nýjar veiðitölur verða uppfærðar á vef Landssambands Veiðifélaga á morgun. Vegna forfalla erlendra veiðimanna er sama sagan þar eins og í öðrum ám, eitthvað af stöngum koma aftur í sölu og tilboð hafa verið auglýst af og til. Það gæti verið spennandi tími framundan þar sem það er stórstreymt í dag og það er vel þekkt að síðsumars stórstreymið skilar oft fínum göngum í ánna.