Patrick Ewing með kórónuveiruna

New York Knicks goðsögnin Patrick Ewing hefur verið lagður inn á spítala í Washington og er í einangrun eftir að hafa verið greindur með kórónuveiruna.

Ewing er 57 ára gamall og er þjálfari Georgetown háskólans í dag. Hann sendi fylgjendum sínum á Twitter skilaboð þar sem hann staðfesti tíðindin.

Ewing er hluti af heiðurshöll NBA deildarinnar en á 17 ára ferli sínum í deildinni var hann 11 sinnum valinn í Stjörnuliðið. Þá á hann tvö Ólympíugull en hann var meðal annars hluti af The Dream Team á Ólympíuleikunum í Barcelona árið 1992.