Al­mennings­salernum komið fyrir við rætur Esju

Búið er að koma fyrir almenningssalernum hjá Mógilsá, við upphaf gönguleiðarinnar upp að Þverfellshorni, eða þá Steini. Áætlaður kostnaður við verkið er 35 til 40 milljónir króna.

Í tilkynningu á vef Reykjavíkurborgar segir að næstu daga verði húsið tengt við lagnir og gengið frá umhverfi þess. Er áætlað að mögulegt verði að opna aðstöðuna almenningi í næsta mánuði.

„Þrjú salerni eru í nýja húsinu og er eitt þeirra sérsniðið fyrir fatlaða. Einnig er góð aðstaða fyrir þá sem hafa umsjón með húsunum. Rafmagn, sem og heitt og kalt vatn er lagt í húsið og fráveita verður í rotþró sem búið er að ganga frá. Húsið er innflutt einingahús. 

Hluti af verkinu er lagning stíga að því og gerð brúar yfir ána. Áætlaður kostnaður við verkið í heild er 35 - 40 milljónir króna,“ segir í tilkynningunni.