Steypuvinnu Landhelgisgæslunnar til að koma í veg fyrir olíuleka frá tankskipinu El Grillo lauk síðdegis í dag. Skipið hefur legið á 32 metra dýpi á botni Seyðisfjarðar í 76 ár eða síðan því var sökkt í febrúar 1944.
Olía hefur lekið úr skipinu á sumrin þegar sjór hlýnar með skaðlegum áhrifum fyrir lífríkið á svæðinu. Sjö kafarar frá séraðgerðasveit Landhelgisgæslunnar unnu að verkinu neðansjávar og áhöfnin á varðskipinu Þór kom að undirbúningi þess.
