Hlýnandi veður sést loksins í spákortum

„Ég sé í raun bara góða tíð framundan. Eftir þennan dag þá hlýnar hægt og bítandi,“ sagði Einar Sveinbjörnsson veðurfræðingur þegar hann ræddi langtímaspána við þá Gunnlaug Helgason og Heimi Karlsson í þættinum Í bítið í morgun.

„Langtímaspár, þær eru nokkuð hagstæðar. Sérstaklega er sýnt að það eigi að hlýna hérna á Páskadag og á annan í páskum,“ bætti Einar við en hann skrifar á veðurvefinn Bliku.

Hér má sjá Einar lýsa langtímahorfum:

Langtímaspá Veðurstofu Íslands í morgun tekur í sama streng en hún hljóðar þannig:

Á laugardag: Suðaustan- og austanátt og dálítil rigning eða slydda, en þurrt að kalla norðanlands. Hlýnandi veður.

Á sunnudag (páskadagur): Fremur hæg suðvestanátt, þurrt að kalla og milt í veðri.

Á mánudag (annar í páskum): Útlit fyrir suðvestan strekking eða allhvassan vind og hlýindi. Rigning sunnan- og vestantil en annars þurrviðri.